نبی کریم صلی اللہ علیہ وسلم بحیثیت والد

اولاد اور ان کی اولاد کے لیے اللہ تعالیٰ سے دعائیں فرماتے تھے۔ درجِ ذیل پانچ مثالوں سے اس کی وضاحت ہوتی ہے: ا:سہاگ رات بیٹی ، ان کے شوہر اور نسل کے لیے دُعائیں: اس بارے میں دو روایات ملاحظہ فرمائیے: ۱: حضراتِ ائمہ ابن سعد، ابن السُّنِّی ، طبرانی اور بزّار نے حضرت بریدہ رضی اللہ عنہ سے روایت نقل کی ہے ، کہ جب [حضرت علی رضی اللہ عنہ کی]شبِ زفاف تھی ، آنحضرت صلی اللہ علیہ وسلم نے فرمایا([1]): ’’ لَا تُحْدِثْ شَیْئًا حَتّٰی تَلْقَانِيْ۔‘‘ [’’میرے آنے تک کچھ نہ کرنا۔‘‘] انہوں نے بیان کیا : ’’رسول اللہ صلی اللہ علیہ وسلم نے (تشریف لانے کے بعد) ایک برتن منگوایا اور اس میں وضو فرمایا ، پھر اس (برتن میں موجود پانی) کو علی رضی اللہ عنہ پر انڈیل دیا ، پھر (دُعا کرتے ہوئے) کہا: ’’ اَللّٰھُمَّ بَارِکْ فِیْھِمَا ، وَبَارِکْ عَلَیْھِمَا ، وَبَارِکْ لَھُمَا فِيْ نَسْلِھِمَا۔‘‘ ([2]) [’’اے اللہ!ان دونوں میں برکت ڈالیے ، اور دونوں پر برکت[نازل] فرمائیے اور ان دونوں کے لیے ان کی نسل میں برکت عطا فرمائیے۔‘‘] حافظ ابن السُّنی کی روایت میں دُعا کے الفاظ حسب ذیل ہیں: ’’اَللّٰھُمَّ بَارِکْ فِیْھِمَا ، وَبَارِکْ عَلَیْھِمَا ، وَبَارِکْ لَھُمَا فِيْ شَمْلِھِمَا۔‘‘ ([3])

[1] جب حضرت فاطمہ رضی اللہ عنہا کی شادی کی رات تھی، تو آنحضرت صلی اللہ علیہ وسلم نے حضرت علی رضی اللہ عنہ سے فرمایا۔ [2] الفاظِ حدیث الطبقات الکبریٰ ۸؍۲۱۔ کے ہیں۔حدیث شریف کا ابتدائی حصہ اور تخریج اس کتاب کے صفحات ۶۸۔۶۹ پر ملاحظہ فرمائیے۔ [3] ملاحظہ ہو: کتاب عمل الیوم واللیلۃ ، باب ما یقول للعرس لیلۃ البناء ، جزء من رقم الحدیث ۶۰۷ ، صفحات ۲۱۴۔ ۲۱۵۔