نبی رحمت ص کی راتیں

۱۰۔ہر چیز کے شر،قرض اور فقر و فاقے سے نجات کی دعا: حضرت ابوہریرہ رضی اللہ عنہ اس حدیث کے راوی ہیں اور امام مسلم نے اسے روایت فرمایا ہے: سہیل (راوی حدیث) نے کہا کہ ابو صالح یحییٰ حکم دیتے تھے ....ابو صالح اس حدیث کو حضرت ابوہریرہ رضی اللہ عنہ اور وہ رسول اللہ صلی اللہ علیہ وسلم سے روایت کرتے تھے....کہ جب ہم میں سے کوئی سونے کا ارادہ کرے تو وہ دائیں کروٹ پر سوئے،پھر یہ دعا پڑھے: ((أَللّٰہُمَّ رَبَّ السَّمٰوَاتِ وَرَبَّ الْأَرْضِ وَرَبَّ الْعَرْشِ الْعَظِیْمِ،رَبَّنَا وَرَبَّ کُلِّ شَیْئٍ،فَالِقَ الْحَبِّ وَالنَّوَیٰ،مُنْزِلَ التَّوْرَاۃِ وَالْاِنْجِیْلِ وَالْفُرْقَانِ،أَعُوْذُبِکَ مِنْ شَرِّ کُلِّ شَیْئٍ أَنْتَآخِذٌ بِنَاصِیَتِہٖ،أَللّٰہُمَّ أَنْتَ الْأَوَّلُ فَلَیْسَ قَبْلَکَ شَیْئٌ وَأَنْتَ الْآخِرُ فَلَیْسَ بَعْدَکَ شَیْئٌ،وَأَنْتَ الظَّاہِرُ فَلَیْسَ فَوْقَکَ شَیْئٌ وَأَنْتَ الْبَاطِنُ فَلَیْسَ دُوْنَکَ شَیْئٌ اِقْضِ عَنَّا الدَّیْنَ وَأَغْنِنَا مِنَ الْفَقْرِ۔)) ’’اے اللہ! آسمانوں اور زمین کے رب،عرش عظیم کے رب،ہمارے اور ہر چیز کے رب! دانے اور گٹھلیوں کے پھاڑنے والے،توراۃ،انجیل اور فرقان (یعنی قرآن کریم) کے نازل کرنے والے (ہمارے پروردگار) میں آپ کی پناہ میں آتا ہوں ہر اس شے کے شر سے کہ جس کی پیشانی کو آپ تھامے ہوئے ہیں۔اے اللہ! آپ ہی اول ہیں اور آپ سے پہلے کچھ بھی تو نہ تھا اور آپ ہی آخر ہیں کہ آپ کے بعد تو سرے سے ہی کچھ نہیں۔آپ ظاہر ہیں کہ آپ سے بلند کچھ بھی نہیں اور باطن بھی آپ ہی ہیں کہ کچھ بھی تو آپ سے مخفی نہیں۔اے ہمارے رب! ہمارے اوپر سے ہمارا قرض اتار دیجیے اور ہمیں فقیری سے تونگری کی راہوں پر ڈال دیجیے۔‘‘