مختصر مسائل و احکام نمازِ جنازہ

اس کے علاوہ خاص طور پر نمازِ جنازہ میں سورۂ فاتحہ کا پڑھنا خود نبی اکرم صلی اللہ علیہ وسلم اور صحابہ کرام رضی اللہ عنہم سے ثابت ہے۔چنانچہ صحیح بخاری شریف،ابوداؤد،ترمذی،نسائی،بیہقی اور مستدرک حاکم میں ہے کہ حضرت عبداﷲبن عباس رضی اللہ عنہما نے ایک نمازِ جنازہ پڑھائی،انہوں نے اس میں سورہ ٔ فاتحہ(بلند آواز سے)پڑھی اور پھر(نماز کے بعد)فرمایا: ((لِتَعْلَمُوْا اَنَّھَا سُنَّۃٌ)) ’’(میں نے بلند آواز سے سورۂ فاتحہ اسلئے پڑھی ہے)تاکہ تم جان لو کہ اسکا پڑھناسنت(نبی صلی اللہ علیہ وسلم کا طریقہ)ہے۔‘‘[1] امام بخاری رحمہ اللہ نے اپنی تاریخ میں فضالہ بن امیہ رحمہ اللہ سے روایت بیان کی ہے کہ جس شخص نے حضرت صدیق وفاروق رضی اللہ عنہما کی نمازِ جنازہ پڑھائی اس نے سورۂ فاتحہ پڑھی تھی۔[2] المسند والاُم للشافعی اور مصنف ابن ابی شیبہ میں حضرت ابوامامہ رضی اللہ عنہ سے مروی ہے: ((اِنَّ السُّنَّۃَ فِی الصَّلَوٰۃ عَلَیٰ الْجَنَازَۃِ اَنْ یُّکَبِّرُ الْاِمَامُ ثُمَّ یَقْرَأُ بِفَاتِحَۃِ الْکِتَابِ))[3] ’’نمازِ جنازہ میں سنّت یہ ہے کہ امام تکبیر کہے اور پھر اس میں سورۂ فاتحہ پڑھے۔‘‘ امام اسحاق بن راہویہ،ابن تیمیہ اور بعض دیگر محدّثین نمازِ جنازہ میں سورۂ فاتحہ کے قائل ہیں لیکن اسے فرض نہیں سنت سمجھتے ہیں۔[4] نمازِ جنازہ میں سورۂ فاتحہ پڑھنے کے بکثرت دلائل کتبِ حدیث وفقہ میں مذکورہیں۔[5]

[1] بخاری مع الفتح ۳؍۲۰۳،ارواء الغلیل ۳؍۱۷۸،نیل الاوطار۲؍۴؍۶۰ واحکام الجنائز،ص:۱۱۹ [2] المنتقی مع نیل الاوطار۲؍۴؍۶۱ [3] الارواء الغلیل ۳؍۱۸۰۔۱۸۱وصححہٗ الالبانی [4] نیل الاوطار۲؍۴؍۶۱ ورجحہٗ صاحب عون المعبود ۴؍۵۰۹،زادالمعاد ۱؍۵۰۵ [5] دیکھیے شرح معانی الآثار طحاوی ۱؍۳۳۵ باب التکبیر علیٰ الجنائز،عمدۃ القاری للعینی ۷؍۱۴۷،۱۴۱،۱۴۰،امام الکلام مولانا عبدالحیٔ لکھنوی،ص۲۳۳،التعلیق الممجد علیٰ مؤطا امام محمد لہٗ،ص:۱۳۱،احکام الجنائز للالبانی،ص:۱۱۹تا۱۲۱