مباحث فی علوم القرآن

یقینا یہ ایک بہت بڑی کاوش ہے تاکہ جستجو کرنے والا وحی کی تمام منازل کو اس کے تمام مراحل میں تلاش کر سکے، قرآن کی آیات کے نزول کا وقت معین کر سکے، اس کی جگہ کی تحدید کر سکے، اور ان آیات کے طرزِ خطاب میں جو اسلوب پایا جاتا ہے اس کے قیاسی ضوابط کو دیکھ کر مکی ومدنی کی پہچان کر سکے۔ اسی طرح سورت یاآیت کے موضوع سے بھی تعاون لیا جا سکتا ہے کہ اس کا تعلق مکہ میں دی جانے والی دعوت سے ملتا ہے یا کہ مدینہ میں دی جانے والی دعوت سے، جب مختلف قسم کے دلائل کی بھرمار کی وجہ سے کسی محقق کے لیے الجھن پیدا ہو جائے تو پھر وہ ان میں کسی کو ترجیح دینے کی کوشش کرے گا، بعض کو مکہ میں نازل ہونے والی اور بعض کو مدنی آیات میں شامل کرے گا۔ جب کچھ آیات ایک جگہ نازل ہوئیں پھر نزول کے فوراً بعد کسی ایک صحابی نے انہیں کسی دوسری جگہ پہنچا دیا تو علماء نے انہیں اسی طرح بیان کرتے ہوئے کہہ دیا کہ یہ آیات مکہ سے مدینہ یا مدینہ سے مکہ لائی گئی ہیں ۔ ابوالقاسم حسن بن محمد بن حبیب نیشاپوری اپنی کتاب ’’التنبیہ علیٰ فضل علوم القرآن‘‘ میں کہتے ہیں : علومِ قرآن میں سب سے بہترین علم اس کے نزول کی جہات اور مکی ومدنی نزول کی ترتیب ہے، اسی طرح مکہ میں نازل ہونے والی مدنی اور مدینہ میں نازل ہونے والی مکی آیات، مکہ میں اہل مدینہ کے بارے نازل ہونے والی آیات، مدینہ میں اہل مکہ کے بارے نازل ہونے والی آیات، وہ مکی نزول جو مدنی نزول کے مشابہ ہے یا وہ مدنی نزول جو مکی نزول کے مشابہ ہے، اسی طرح جحفہ، بیت المقدس، طائف اور حدیبیہ میں نازل ہونے والی آیات، رات کے وقت کیا نازل ہوا، دن کو کیا اترا، عمومی اور انفرادی طور پر نازل ہونے والی آیات، مکی سورتوں کی مدنی آیات، مدنی سورتوں کی مکی آیات، مکہ سے مدینہ لے جائی جانے والی، مدینہ سے حبشہ کی طرف لے جائی جانے والی آیات، کیامختصر نازل ہوا کیا مفصل، وہ آیات جنہیں بعض نے مکی کہا اور بعض نے مدنی، یہ پچیس اقسام ہیں ، جس شخص کو ان سب کے بارے علم نہ ہو اور ان میں امتیاز نہ کر سکے گا، اسے کتاب اللہ کے بارے گفتگو کرنا جائز نہیں ۔ اہل علم نے انتہائی دقت سے کام لیتے ہوئے ہر سورت کو اس کی