مباحث فی علوم القرآن

کر دی تو دوسری ہر قسم کی کلام وہ انسانوں اور جنات کی ہو یا فرشتوں کی، اس سے خارج ہوگئی اور ’’المنزل‘‘ کہہ کر اسے اس کلام سے خارج کر دیا گیا جو اس کے پاس محفوظ ہے، جس کے متعلق اللہ تعالیٰ فرماتے ہیں : ﴿قُلْ لَّوْ کَانَ الْبَحْرُ مِدَادًا لِّکَلِمٰتِ رَبِّیْ لَنَفِدَ الْبَحْرُ قَبْلَ اَنْ تَنْفَدَ کَلِمٰتُ رَبِّیْ وَ لَوْ جِئْنَا بِمِثْلِہٖ مَدَدًا.﴾ (الکہف: ۱۰۹) ’’(اے نبی صلی اللہ علیہ وسلم )! آپ کہہ دیجیے اگر سمندر میرے رب کے کلمات کے لیے روشنائی بن جائیں تو میرے رب کے کلمات ختم ہونے سے پہلے سمندر ختم ہو جائیں گے، خواہ ہم اس کے برابر مزید روشنائی لے آئیں ۔‘‘ نیز فرمایا: ﴿وَ لَوْ اَنَّ مَا فِی الْاَرْضِ مِنْ شَجَرَۃٍ اَقْلَامٌ وَّ الْبَحْرُ یَمُدُّہٗ مِنْ بَعْدِہٖ سَبْعَۃُ اَبْحُرٍ مَّا نَفِدَتْ کَلِمٰتُ اللّٰہِ﴾ (لقمان: ۲۷) ’’اگر روئے زمین کے درخت قلم اور سمندر روشنائی بن جائیں ، ان کے بعد سات سمندر اور آجائیں تو بھی اللہ تعالیٰ کے کلمات ختم نہیں ہوں گے۔‘‘ منزل کے ساتھ محمد صلی اللہ علیہ وسلم کی نسبت کر کے اسے سابقہ انبیاء پر نازل ہونے والی کتب مثلاً: تورات وانجیل وغیرہ سے خارج کر دیا گیا۔ نیز المتعبد بتلاوتہ یعنی اس کی تلاوت عبادت ہے ، کہہ کر اخبارِ احاد اور احادیث قدسیہ کی قراء ت کو اس سے خارج کر دیا، گوکہ احادیث قدسیہ کے الفاظ اللہ تعالیٰ کی طرف سے ہوتے ہیں ، لیکن انہیں قرآن کریم جیسا درجہ حاصل نہیں ہے، کیوں کہ ’’اس (قرآن)کی تلاوت عبادت ہے۔‘‘ اس جملے کا مطلب ہے کہ نماز وغیرہ میں عبادت کی غرض سے اس کی قراء ت کرنے کا حکم دیا گیا ہے۔ قرآن کریم کے اسماء اور اوصاف: اللہ تعالیٰ نے قرآن کریم کو بہت سے نام دیے ہیں ، مثلاً: القرآن: ﴿اِنَّ ہٰذَا الْقُرْاٰنَ یَہْدِیْ لِلَّتِیْ ہِیَ اَقْوَمُ﴾ (الاسراء: ۹) الکتاب: ﴿لَقَدْ اَنْزَلْنَآ اِلَیْکُمْ کِتٰبًا فِیْہِ ذِکْرُکُمْ﴾ (الانبیاء: ۱۰)