مباحث فی علوم القرآن

ہوگی یا حسی اور علمی طور اس کا مدلول معلوم نہ ہونے کی وجہ سے اسے ذکر کرنے ضرورت نہ رہی ہوگی یا یہ بھی ہو سکتا ہے کہ اس کے کسی جزء، کل یا نظیر کو کسی بھی طرح سے اس کے مصاحب بننے والے کے طور پر ذکر کیا گیا ہوگا۔ ان امور کی بناء پر وہ مرجع جس کی طرف ضمیر غائب لوٹ رہی ہوتی ہے اس کا ذکر لفظی طور پرضمیر سے پہلے ہونا ضروری ہے اور اکثر ایسے ہی ہوتا ہے جیسے آیت ﴿وَ نَادٰی نُوْحُ نِ ابْنَہٗ﴾ (ہود: ۴۲) میں ضمیر سے پہلے اس کا مرجع نُوحٌ موجود تھے۔ یا ضمیر غائب کا مرجع سابقہ کلام کے ضمن میں موجود ہو، مثلاً: ﴿یٰٓأَیُّہَا الَّذِیْنَ اٰمَنُوْا کُوْنُوْا قَوّٰمِیْنَ لِلّٰہِ شُہَدَآئَ بِالْقِسْطِ وَ لَا یَجْرِمَنَّکُمْ شَنَاٰنُ قَوْمٍ عَلٰٓی اَلَّا تَعْدِلُوْا اِعْدِلُوْا ہُوَ اَقْرَبُ لِلتَّقْوٰی وَ اتَّقُوْا اللّٰہَ﴾ (المائدہ: ۸) یہاں ھُوَ ضمیر اِعْدِلُوْا کے لفظ میں پائے جانے والے مادہ عدل کی طرف لوٹ رہی ہے یعنی عدل تقوی کے زیادہ قریب ہے۔ یا ضمیر غائب کسی التزام پر دلالت کر رہی ہو، مثلاً: ﴿فَمَنْ عُفِیَ لَہٗ مِنْ اَخِیْہِ شَیْئٌ فَاتِّبَاعٌ بِالْمَعْرُوْفِ وَ اَدَآئٌ اِلَیْہِ بِاِحْسَانٍ﴾ (البقرہ: ۱۷۸) اس میں اِلَیْہِ کی ضمیر معاف کرنے والے کی طرف لوٹ رہی ہے جو لفظ عُفِی کو مستلزم ہے۔ (یعنی معاف تبھی کیا جا سکتا ہے جب معاف کرنے والا ہوگا) کبھی ایسے بھی ہوتا ہے کہ مرجع لفظوں میں مؤخر ہوتا ہے، رتبے میں نہیں ، جیسے: ﴿فَاَوْجَسَ فِیْ نَفْسِہٖ خِیْفَۃً مُّوْسٰی.﴾ (طٰہٰ: ۶۷) اس میں نَفْسِہٖ کی ضمیر کا مرجع مُوْسٰی لفظا بعد میں ہے۔ کبھی مرجع لفظاً اور رتبۃً بعد میں ہوتا ہے، جیسے: ضمیر شان، ضمیر قصہ یا نعم اور بئس کی ضمائر کے ساتھ ہوتا ہے۔ ان مثالیں یہ آیات ہیں : ﴿قُلْ ہُوَ اللّٰہُ اَحَدٌ.﴾ (الاخلاص: ۱) (ضمیر شان)