مباحث فی علوم القرآن

مطلوب ہے یعنی اپنے دل کو قراء ت کے معانی میں غوروفکر کرنے میں مشغول کرے اور ہر آیت کے ساتھ شعور اور جذبات کو دعا، استغفار، رحمت اور عذاب کے ساتھ وابستہ رکھے۔ اللہ تعالیٰ کا فرمان ہے: ﴿وَ یَخِرُّوْنَ لِلْاَذْقَانِ یَبْکُوْنَ وَ یَزِیْدُہُمْ خُشُوْعًا.﴾ (الاسراء: ۱۰۹) ’’وہ منہ کے بل گرتے ہیں روتے ہیں اور ان کی عاجزی میں اضافہ ہو جاتا ہے۔‘‘ اسی طرح سیدنا عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھ سے فرمایا: ’’مجھے قرآن پڑھ کر سناؤ۔‘‘ میں نے عرض کی: اے اللہ کے رسول! میں آپ کو سناؤں حالانکہ آپ پر نازل ہوتا ہے؟ تو آپ نے فرمایا: ’’ہاں میں کسی دوسرے سے سننا چاہتا ہوں ۔‘‘ چناں چہ میں نے سورت النساء کی تلاوت شروع کی، جب میں آیت: ﴿فَکَیْفَ اِذَاجِئْنَا مِنْ کُلِّ اُمَّۃٍ بِشَہِیْدٍ وَّجِئْنَا بِکَ عَلٰی ہٰٓؤُلَآئِ شَہِیْدًا.﴾ (النساء: ۴۱) پر پہنچا تو آپ نے فرمایا: ’’بس کرو‘‘ میں نے آپ کی طرف دیکھا تو آپ کی آنکھوں سے آنسو جاری تھے۔ (اخرجہ البخاری وَغَیْرُہُ) امام نووی ’’شرح المہذب‘‘ میں کہتے ہیں : آنکھوں میں آنسو لانے کا طریقہ یہ ہے کہ پڑھنے والا سخت وعید، ڈراوے اور وعدہ ومیثاق والی آیات پر خوب غور کرے، پھر ان معاملات میں اپنی کمزوریاں دیکھے، اگر یہ سب کرنے کے باوجود اس کا دل نہ دہلے اور رونا نہ آئے تو ایسا نہ ہونے پررو دے کیوں کہ یہ بہت بڑی مصیبت ہے۔ امام ابن ماجہ نے سیدنا انس رضی اللہ عنہ سے روایت بیان کی ہے کہ رسول اللہ صلی اللہ علیہ وسلم نے فرمایا: ’’آخر وقت میں یا اس امت کے آخر میں کچھ لوگ نمودار ہوں گے، وہ قرآن پڑھیں گے لیکن قرآن ان کے حلقوں سے آگے نہیں پڑھے گا، جب تم انہیں دیکھو یا ان سے ملو تو انہیں قتل کرنا۔‘‘ ۹۔ قراء ت خوبصورت آواز میں کی جائے کیوں کہ قرآن کریم آواز کی زینت ہے اور اچھی آواز دل میں گھر کر جاتی ہے حدیث میں ہے ’’قرآن کو اپنی خوبصورت آواز میں پڑھو۔ (رواہ ابن حبان وغیرہ)