مباحث فی علوم القرآن

مہیا ہوئی۔ ابتدا میں اہلِ علم اس ڈر سے اسے ناپسند کرتے تھے کہ کہیں یہ چیز قرآن میں اضافے کے مترادف نہ ہو۔ ان کی دلیل سیدنا ابنِ سعود رضی اللہ عنہ کا قول تھا کہ ((جَرِّ دُوا القُرْآنَ وَلَا تَخُطُّوہُ بِشَیْئٍ)) یعنی قرآن کریم کو ہر قسم کی آمیزش سے محفوظ رکھو۔ جب کہ بعض لوگ نقطوں کو جائز اور دس آیات یا ابتدائی آیات کے فرق کو ظاہر کرنے والی علامات کو ناجائز سمجھتے تھے۔ حلیمی کہتے ہیں : قرآن میں دس یا پانچ آیات کی نشان دہی کرنے والی اور اسی طرح سورتوں اور آیات کی تعداد کے لیے وضع کی گئی علامات کو اہلِ علم سیدنا عبداللہ بن مسعود رضی اللہ عنہ کے مذکورہ قول کی وجہ سے ناپسند کرتے تھے، لیکن نقطے جائز ہیں کیوں کہ ان کی شکل وصورت ایسی نہیں ہے کہ جس سے ایسی چیز کے قرآن ہونے کا وہم ہو جو قرآن نہیں ہے، بلکہ یہ تو پڑھے جانے والے الفاظ کی شکل کو واضح کرتے ہیں ، لہٰذا ضرورت مند کے لیے ان کو لکھنا جائز ہے۔ پھر ایک وقت آیا کہ اس چیز کو مباح اور مستحب قرار دے دیا گیا۔ ابن ابی داؤد حسن بصری اور ابن سیرین سے بیان کرتے ہیں کہ انہوں نے فرمایا: قرآن کے نقطے لگانے میں کوئی حرج نہیں ہے۔ اسی طرح ربیعہ بن ابی عبدالرحمان کا قول ہے، اعراب لگانے میں کوئی حرج نہیں ہے۔ امام نووی فرماتے ہیں : قرآن میں نقطے اور اعراب لگانا مستحب ہے، کیوں کہ اس سے آدمی لحن اور تحریف سے بچ جاتا ہے۔ (انظر الاتقان: ۲/۱۷۱) چناں چہ آج قرآن کے رسم الخط کی خوبصورتی، خط عربی میں اپنی انتہا کو پہنچ چکی ہے۔ فاصلے اور اختتام آیت کی علامات: فواصل اور آیت کے اختتام کی علامات بدولت قرآن کریم کو ایک منفرد امتیاز حاصل ہے۔ فاصلہ: وہ علامت جس کی وجہ سے ایک کلام اپنے بعد والے کلام سے علیحدہ ہو جائے، وہاں کبھی آیت کا اختتام ہوتا ہے اور کبھی نہیں اور فاصلہ وہاں آتا ہے جہاں خطابی کلام کا اختتام ہو رہا ہو۔ اسے فاصلہ اس لیے کہا جاتا کہ یہاں کلام علیحدہ ہو رہی ہوتی ہے۔