مباحث فی علوم القرآن

عثمان بن ابی العاص بیان کرتے ہیں کہ میں رسول اللہ صلی اللہ علیہ وسلم کے پاس بیٹھا ہوا تھا کہ اچانک آپ نے اپنی نظر اوپر کو اٹھائی پھر جھکالی پھر فرمایا: ((اَتَانِی جِبْرِیْل فَامَرنِی اَنْ اَضَعَ ہٰذِہِ الْاٰیَۃَ ہٰذَا الْمَوضَعِ من ھذہ السُّوْرَۃ ﴿اِنَّ اللّٰہَ یَاْمُرُ بِالْعَدْلِ وَ الْاِحْسَانِ وَ اِیْتَآیِٔ ذِی الْقُرْبٰی﴾ (النحل: ۹۰) الی آخِرھَا۔ (اخرجہ احمد باسناد حسن)) میرے پاس جبریل علیہ السلام آئے اور انہوں نے مجھے حکم دیا کہ میں اس آیت ﴿اِنَّ اللّٰہَ یَاْمُرُ بِالْعَدْلِ وَ الْاِحْسَانِ ……﴾ کو فلاں سورت میں فلاں جگہ لکھوں ۔ سیدنا عثمان رضی اللہ عنہ نے جب قرآن جمع کیا تو آپ قرآن کی سورتوں میں ہر آیت کی جگہ پر توقف فرماتے اور اگر آیت منسوخ حکم والی بھی ہوتی تو اسے تبدیل نہ کرتے۔ لہٰذا اس سے ثابت ہوتا ہے کہ موجودہ ترتیب کے ساتھ قرآن کی کتابت توقیفی ہے۔ سیدنا عبداللہ بن زبیر رضی اللہ عنہ فرماتے ہیں : میں نے عثمان رضی اللہ عنہ سے کہا سورۃ البقرہ کی آیت ﴿وَ الَّذِیْنَ یُتَوَفَّوْنَ مِنْکُمْ وَ یَذَرُوْنَ اَزْوَاجًا﴾ (البقرہ: ۲۳۴) کو دوسری آیت نے منسوخ کر دیا تھا لہٰذا آپ اسے نہ لکھیں یا اسے چھوڑ دیں تو وہ فرمانے لگے: اے بھتیجے! میں کسی بھی چیز کو اس کی جگہ سے تبدیل نہیں کروں گا۔ (بخاری) بعض احادیث میں سورتوں کی کچھ آیات کی فضیلت وارد ہوئی ہے جن سے ان کی ترتیب کا توقیفی ہونا لازم آتا ہے، کیوں کہ اگر انہیں تبدیل کرنا جائز ہوتا تو حدیث کے ساتھ ان کی مطابقت نہ ہو پاتی۔ سیدنا ابوالدرداء رضی اللہ عنہ سے مرفوع حدیث مروی ہے کہ رسول اللہ صلی اللہ علیہ وسلم نے فرمایا: ((مَنْ حَفِظ عَشْرَ آیاتٍ من اَوَّلِ سُوْرَۃِ الکَھْفِ عُصِمَ من الدَّجَّالِ۔)) جن نے سورت کہف کی ابتدائی دس آیات یاد کرلیں ، وہ مسیح دجال کے فتنے سے محفوظ ہو جائے گا۔‘‘ ایک روایت کے الفاظ ہیں ((مَنْ قَرَئَ الْعَشْرَ لَاوَاخِرَ مِنْ سُوْرَۃِ الْکَھْفِ۔)) جس نے سورۃ الکہف کی آخری دس آیات پڑھیں ۔ (رواہ مسلم)