مباحث فی علوم القرآن

مبحث: 9 آیات اور سورتوں کی ترتیب آیات کی ترتیب: قرآن کریم آیات اور سورتوں کا مجموعہ ہے جن میں سے کچھ چھوٹی ہیں اور کچھ طویل۔ آیت: کلام اللہ کا وہ جملہ جو قرآن کریم میں درج ہو اسے آیت کہا جاتا ہے۔ سورت: قرآن کریم کی چند آیات کے مجموعے کا نام ہے جس کی ایک ابتداء اور ایک انتہاء ہوتی ہے۔ قرآن کریم کی آیات کی ترتیب رسول اللہ صلی اللہ علیہ وسلم سے منقول اور توقیفی ہے اور بعض اہل علم نے اس پر اجماع بیان کیا ہے، جسے زرکشی نے ’’البرھان‘‘ اور ابوجعفر بن زبیر نے اپنی کتاب ’’مناسبات‘‘ میں ذکر کیا ہے۔ وہ کہتے ہیں : آیات کی ترتیب رسول اللہ صلی اللہ علیہ وسلم کے حکم سے توقیفی ہے اور ان میں کسی قسم کا کوئی اختلاف نہیں ہے۔ اسی طرح امام سیوطی نے بھی اسی بات پر اظہار یقین کیا ہے، وہ لکھتے ہیں : آیات کی ترتیب توقیفی ہے اس بات پر اجماع بھی ہے اور اجماع سے ملتی جلتی نصوص بھی وارد ہوئی ہیں اور اس بارے کوئی شک نہیں ہے۔ چناں چہ بیان کیا جاتا ہے کہ جبریل علیہ السلام رسول اللہ صلی اللہ علیہ وسلم کے پاس کچھ آیات لے کر آتے اور سورت میں ان کی جگہ کے بارے رہنمائی کرتے یا پہلے سے نازل شدہ آیات میں ان آیات کی جگہ کی طرف اشارہ کرتے تو رسول اللہ صلی اللہ علیہ وسلم کاتبین وحی کو اسی جگہ ان آیات کو لکھنے کا حکم صادر فرماتے۔ آپ کاتبین وحی سے فرماتے: ’’اس آیت کو اس صورت میں رکھ دو جس میں فلاں فلاں چیز کا تذکرہ ہوا ہے اور فلاں آیت کو فلاں جگہ لکھ دو۔‘‘ پھر اسی طرح آپ کے صحابہ نے اسے آگے لوگوں تک پہنچایا۔