مباحث فی علوم القرآن

جواب یہ ہے کہ یہ تمام اقوال باطل ہیں جن کو کوئی سند نہیں ان تمام تر دعووں کی کوئی دلیل نہیں ہے اور ایسی باتیں کرنا حماقت و بے وقوفی کے علاوہ کچھ نہیں ۔ بعض اہل تشیع علماء ان بے بنیاد باتوں سے براء ت کا اعلان کرتے ہیں جب کہ سیدنا علی رضی اللہ عنہ سے مروی اقوال بھی ان کے دعووں کے برعکس ہیں اور ان کے اقوال سے معلوم ہوتا ہے کہ وہ تواتر قرآن کے بارے اجماع کے قائل تھے، نیز انہوں نے سیدنا ابوبکر رضی اللہ عنہ کے جمع قرآن کے بارے فرمایا تھا: ((اَعْظَمُ النَّاسِ اَجْرًا فِی الْمَصَاحِفِ اَبُوْبَکْرٍ، رَحْمَۃَ اللّٰہِ عَلٰی اَبِیْ بَکْرِ ھُوَ اَوَّلُ مَنْ جَمَعَ کِتَابَ اللّٰہِ۔)) اسی طرح انہوں نے سیدنا عثمان رضی اللہ عنہ کی جمع وتدوین کے بارے فرمایا: اے لوگو! اللہ سے ڈرو، عثمان رضی اللہ عنہ کو ’’حَرَّاقُ المصاحِف‘‘ (قرآن جلانے والا) کہنے سے بچو، اللہ کی قسم! انہوں نے ہم سب صحابہ کی موجودگی میں یہ کام کیا، نیز فرمایا: ’’اگر عثمان رضی اللہ عنہ کے وقت میں والی ہوتا تو میں بھی مصاحف کے متعلق وہی فیصلہ کرتا جو عثمان نے کیا تھا۔ سیدنا علی رضی اللہ عنہ کے مذکورہ اقوال ان لوگوں کی زبانیں بند کرنے کے لیے کافی ہیں جو جھوٹ بولنے والے اور ان کی نصرت کا دعویٰ کرنے والے ہیں اور ان کے حمایتی بن کر بے بنیاد باتیں کرتے ہیں حالانکہ سیدنا علی رضی اللہ عنہ ان کی ان باتوں سے بری ہیں ۔ (انظر مناہل العرفان، ص: ۴۶۴، ج ۱)