مباحث فی علوم القرآن

سیدنا ابوموسیٰ اشعری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: رات کے وقت اشعری لوگ جب نماز شروع کرتے ہیں تو میں انہیں پہچان لیتا ہوں ، میں رات کے وقت ان کی آوازوں کی وجہ سے ان کے ٹھکانے پہچان لیتا ہوں حالانکہ دن کے وقت جب وہ پڑاؤ کرتے ہیں تو میں نے ان کے ٹھکانوں کو نہیں دیکھا ہوتا۔ (رواہ البخاری ومسلم) صحابہ کرام رضی اللہ عنہم اجمعین کو قرآن کریم زبانی یاد کرنے اور پڑھنے پڑھانے کا بہت شوق تھا، اسی لیے رسول اللہ صلی اللہ علیہ وسلم ان کی ہمت بڑھاتے اور ان کے لیے قرآن کی تعلیم دینے والوں کا انتخاب فرمایا کرتے تھے۔ چناں چہ سیدنا عبادہ بن صامت رضی اللہ عنہ فرماتے ہیں : جب کوئی آدمی ہجرت کر کے (مدینہ) آتا تو رسول اللہ صلی اللہ علیہ وسلم اس آدمی کو کسی انصاری آدمی کے سپرد کر دیتے جو اسے قرآن کی تعلیم دیتا۔ مسجد نبوی تلاوت قرآن کی آوازوں سے گونج اٹھا کرتی تھی، یہاں تک کہ رسول اللہ صلی اللہ علیہ وسلم نے انہیں اپنی آوازیں پست کرنے کا حکم دیا تاکہ وہ ایک دوسرے سے جھگڑ نہ پڑیں ۔ (مناہل العرفان للزرقانی، ص: ۲۳۴، ج۱) گزشتہ صفحات میں مذکورہ بخاری شریف کی تین روایات میں صرف سات حفاظ کا تذکرے کو اس چیز پر محمول کیا جا سکتا ہے کہ ان لوگوں نے قرآن کریم مکمل اپنے سینوں میں محفوظ کرنے کے بعد رسول اللہ صلی اللہ علیہ وسلم کو سنایا تھا اور ان کی سند ہم تک پہنچی، جب کہ ان کے علاوہ بھی کثیر تعداد میں حفاظ قرآن تھے لیکن ان میں یہ خوبیاں موجود نہیں تھیں ۔ اسی طرح صحابہ کرام رضی اللہ عنہم اجمعین مختلف شہروں میں پھیل گئے اور انہوں نے ایک دوسرے سے قرآن حفظ کیا، اس کے لیے یہی دلیل کافی ہے کہ بئر معونہ پر قتل ہونے والے صحابہ سب کے سب قراء تھے اور ان کی تعداد ستر تھی، جیسا کہ بخاری میں مذکور ہے۔ امام قرطبی فرماتے ہیں : جنگ یمامہ میں ستر قراء شہید ہوئے، اسی طرح نبی صلی اللہ علیہ وسلم کے دور میں بئرمعونہ کے شہداء کی تعداد بھی اتنی ہی تھی، چناں چہ گزشتہ روایات میں مذکور صرف سات قراء کے متعلق علماء نے یہی بات سمجھی ہے اور ان بارے مروی احادیث کی یہی تاویل کی ہے۔ امام ماوروی سیدنا انس رضی اللہ عنہ کی حدیث ((لَمْ یَجْمَعِ الْقُرْآنَ غَیْرَ اَرْبَعَۃٍ)) یعنی قرآن صرف چار آدمیوں کو یاد تھا پر تعلیق لکھتے ہوئے کہتے ہیں : سیدنا انس کے اس قول سے یہ لازم نہیں آتا کہ