مباحث فی علوم القرآن

مبحث:7 نزولِ قرآن اللہ رب العالمین نے ہمارے نبی محمد صلی اللہ علیہ وسلم پر انسانیت کی ہدایت کے لیے قرآن کریم نازل فرمایا، اس کا نزول ایک عظیم الشان واقعہ ہے جس سے زمین وآسمان میں رہنے والوں کے ہاں اس کی قدرومنزلت کا پتا چلتا ہے، پہلی دفعہ قرآن لیلۃ القدر میں اتارا گیا جس سے آسمانِ دنیا میں رہنے والے فرشتوں کو امت محمدیہ کے شرف وعزت کا پتا چلا، جس امت کو اس نئی رسالت کی ذمہ داری دی گئی تھی، تاکہ وہ تمام امتوں سے بہترین امت بن جائے۔ اس کا دوسرا نزول سابقہ آسمانی کتب کے برعکس آہستہ آہستہ تھوڑا تھوڑا کر کے ہوا، جس سے قوم دہشت زدہ ہوگئی اور اس میں شک کرنے لگی، یہاں تک کہ اس میں حکمتِ الٰہیہ کے اسرارورموز صبح روشن کی واضح ہونے لگے۔ رسول اللہ صلی اللہ علیہ وسلم نے اس عظیم پیغام کو ایک ہی مرتبہ حاصل نہیں کیا کہ حد سے زیادہ ضدی اور ہٹ دھرم قوم کو خوش کر سکیں ، بلکہ آپ پر مسلسل وحی کا نزول ہوتا رہا جس سے آپ کے دل کو سکون ملتا، اسی طرح وحی بھی حالات وواقعات کے مطابق نازل ہوتی رہی یہاں تک کہ اللہ رب العالمین نے اپنے دین کی تکمیل فرما کر اپنی نعمت کو پورا فرما دیا۔ قرآن کا مکمل نزول: اللہ سبحانہ وتعالیٰ اپنی کتاب عزیز میں فرماتے ہیں : ﴿شَہْرُ رَمَضَانَ الَّذِیْٓ اُنْزِلَ فِیْہِ الْقُرْاٰنُ ہُدًی لِّلنَّاسِ وَ بَیِّنٰتٍ مِّنَ الْہُدٰی وَ الْفُرْقَانِ﴾ (البقرہ: ۱۸۵) ’’رمضان کا مہینہ وہ ہے جس میں قرآن اتارا گیا جو لوگوں کے لیے ہدایت ہے۔ نیز (اس میں ) ہدایت کی براہین اور حق وباطل میں فرق کے دلائل موجود ہیں ۔‘‘ دوسری جگہ فرمایا: