مباحث فی علوم القرآن

الشیخ عزالدین بن عبدالسلام[1] فرماتے ہیں : ’’مناسبت کا جاننا ایک اچھا علم ہے لیکن کلام کے ربط میں حسن پیدا کرنے کے لیے شرط یہ ہے کہ وہ کسی ایک معاملے کے بارے میں شروع سے آخر تک جڑا ہوا ہو لیکن اگر وہ مختلف اسباب کے بارے ہو تو اس میں شروع سے آخر تک باہمی ربط کی شرط نہیں ۔‘‘ وہ مزید فرماتے ہیں : ’’جو شخص مختلف اسباب والی آیات میں ربط پیدا کرنے کی کوشش کرے گا تو وہ ایک ناکام کوشش ہوگی، نیز وہ ایسا غیر مناسب ربط پیدا کرے گا، جس سے ہر اچھی بات کو محفوظ رکھنا ضروری ہے، کیوں کہ قرآن بیس سے زیادہ سالوں میں مختلف احکام لے کر نازل ہوا جن کے اسباب بھی مختلف تھے، اس طرح اس کا باہمی ربط ممکن نہیں۔ بعض علماء نے آیات، سورتوں اور جملوں کے درمیان مناسبت بیان کرنے کی کوشش کی ہے اور انہوں نے ان کے باہمی ربط کے لیے بہت ہی عمدہ طریقوں کا استنباط کیا ہے ۔ وہ کہتے ہیں جملہ کبھی اپنے سے پہلے جملے کی تاکید ہوتا ہے، کبھی بیان، کبھی تفسیر اور کبھی معترضہ ہوتا ہے ، ان سب کی مثالیں قرآن میں کثرت سے ملتی ہیں ۔ باہمی ربط کی وجوہات میں سے کسی وجہ سے آیت کا اپنے سے پہلی والی آیت کے ساتھ تعلق ان دونوں کو جمع کر دیتا ہے۔ جیسے مومنین اور مشرکین کی صفات کا تقابل، مشرکین کے لیے وعید اور مومنین کے لیے وعدے، آیاتِ رحمت کے بعد آیاتِ عذاب کا تذکرہ، آیاتِ ترہیب کے بعد آیاتِ ترغیب اور اسی طرح کونی آیات کے بعد اللہ تعالیٰ کی توحید وتنزیہ کی آیات بیان کی جاتی ہیں ۔ کبھی مخاطبین کے احوال کا خیال رکھنے میں مناسبت ہوتی ہے، مثلاً آیات… ﴿اَفَلَا یَنْظُرُوْنَ اِِلَی الْاِِبِلِ کَیْفَ خُلِقَتْ. وَاِِلَی السَّمَآئِ کَیْفَ رُفِعَتْ. وَاِِلَی الْجِبَالِ کَیْفَ نُصِبَتْ. وَاِِلَی الْاَرْضِ کَیْفَ سُطِحَتْ.﴾ (الغاشیۃ:۱۷۔۲۰)

[1] ان کا نام عبدالعزیز بن عبدالسلام تھا اور عزالدین کے لقب سے مشہور تھے، یہ ایک مجاہد عالم تھے، ان کی وفات 660 ہجری میں ہوئی۔