مباحث فی علوم القرآن

اس مناسبت کی معرفت سے قرآن کے معانی، قرآنی بلاغت کے اعجاز، اس کی کلام کے نظم اور عمدہ اسلوب کے ادراک کا فائدہ حاصل ہوتا ہے۔ قرآن کہتا ہے: ﴿الٓرٰ کِتٰبٌ اُحْکِمَتْ اٰیٰتُہٗ ثُمَّ فُصِّلَتْ مِنْ لَّدُنْ حَکِیْمٍ خَبِیْرٍ.﴾ (ہود: ۱) ’’الر، یہ ایک ایسی کتاب ہے، جس کی آیات محکم کی گئی ہیں پھر ایک حکیم با خبر کی طرف سے صاف صاف بیان کی گئی ہیں ۔‘‘ امام زرکشی رحمہ اللہ کہتے ہیں : ’’اس کا فائدہ یہ ہے کہ اس کی معرفت کی وجہ سے اس کلام کے اجزاء آپس میں ملے ہوئے محسوس ہوتے ہیں ، جس کی وجہ سے باہمی ربط مضبوط ہوتا ہے اور کتاب اس مضبوط عمارت کی طرح بن جاتی ہے جس کے اجزاء نہایت خوش اسلوبی سے ملائے گئے ہوں ۔‘‘ قاضی ابوبکر ابن العربی رحمہ اللہ فرماتے ہیں : ’’آیاتِ قرآنیہ کا باہمی ربط انہیں ایک ایسے کلمہ کی شکل دیتا ہے جس کے معانی واضح اور الفاظ منظم ہوں اور یہ ایک عظیم علم ہے۔‘‘ آیات کی مناسبت اور ان کا باہمی ربط کوئی ’’توقیفی‘‘ معاملہ نہیں ہے، بلکہ اس کا دارومدار مفسر کی کوشش ومحنت، اعجازِ قرآنی سے اس کی دلچسپی، بلاغت قرآنی کے اسرار اور منفرد طرز بیان کے اسباب سے واقفیت پر ہوتا ہے۔ چناں چہ جب مناسبت میں معانی کی باریکیاں ، اسلوبِ بیان میں باہمی ربط اور علوم عربیہ کے لغوی اصولوں کی موافقت پائی جائے تو یہ بہت ہی لطیف اور پسندیدہ ہوگی۔ اس کا مطلب یہ بھی نہیں ہے کہ مفسر ہر آیت کی مناسبت تلاش کرتا پھرے، کیوں کہ قرآن حادثات وواقعات کے مطابق تھوڑا تھوڑا کرکے نازل ہوا ہے، اس لیے ہو سکتا ہے کہ مفسر کو کسی وقت قرآنی آیات کا باہمی ربط مل جائے اور کبھی نہ مل سکے۔ چناں چہ مناسبت ایسی ہو جو مناسب لگے اور بے ربط نہ ہو، ورنہ یہ ایک ناپسندیدہ تکلف ہی ہوگا۔