مباحث فی علوم القرآن

’’شانِ نزول کے بارے کہا جاتا ہے کہ آیات اس واقعہ کے رونما ہونے والے دنوں میں نازل ہوئیں ، یہ صرف اس لیے کہ واحدی کی اس بات سے احتراز کیا جا سکے جو انہوں نے سورت فیل کی تفسیر کرتے ہوئے لکھی ہے کہ اس سورت کے نزول کا سب اہل حبشہ کی آمد تھا۔ حالاں کہ ان کی آمد کا سبب نزول سے کوئی تعلق نہیں بلکہ اس میں تو گزرے ہوئے حالات کی خبر دی گئی ہے، جس طرح قوم نوح، قوم عاد وثمود اور بناء کعبہ کے بارے آگاہی دی گئی ہے، اور اسی طرح آیت: ﴿وَاتَّخَذَاللّٰہُ اِبْرٰہِیْمَ خَلِیْلاً.﴾ (النساء: ۱۲۵) تو ابرہیم علیہ السلام کو خلیل بنانا اس کا شانِ نزول سے کوئی تعلق نہیں ہے۔ اسبابِ نزول کی معرفت کے فوائد: اسبابِ نزول کی معرفت کے اہم فوائد یہ ہیں : ۱۔ اس حکمت کو بیان کرنا جس کی وجہ سے کسی حکم کے بارے قانون سازی کی گئی ہو، اس طرح اس سے عمومی مصلحتوں کے لیے ان شرعی سہولتوں کا ادراک ہوتا ہے جن کی بدولت حوادث وواقعات سے عہدہ برآ ہو کر امت کے لیے رحمت کا سامان مہیا ہوتا ہے۔ ۲۔ اہل علم کا یہ کہنا کہ قرآنی حکم اگرچہ عام لفظوں میں نازل ہوا، لیکن مخصوص ہونے کی وجہ سے اسی خاص سب کا اعتبار ہوگا نہ کہ الفاظ کے عموم کا، تو یہ ایک اختلافی مسئلہ ہے جس کی وضاحت آئندہ صفحات میں آئے گی۔ اس کی مثال اس آیت سے دی جاتی ہے۔ ﴿لَا تَحْسَبَنَّ الَّذِیْنَ یَفْرَحُوْنَ بِمَآ اَتَوْا وَّ یُحِبُّوْنَ اَنْ یُّحْمَدُوْا بِمَا لَمْ یَفْعَلُوْا فَلَا تَحْسَبَنَّہُمْ بِمَفَازَۃٍ مِّنَ الْعَذَابِ وَ لَہُمْ عَذَابٌ اَلِیْمٌ.﴾ (آل عمران: ۱۸۸) ’’وہ لوگ جو اپنے کرتوتوں پر خوش ہیں اور چاہتے ہیں کہ جو انہوں نے نہیں کیا اس پر بھی ان کی تعریفیں کی جائیں ، آپ انہیں عذاب سے چھٹکارا میں نہ سمجھیں ، ان کے لیے تو درد ناک عذاب ہے۔‘‘ بیان کیا جاتا ہے کہ مروان نے اپنے دربان رافع سے کہا کہ عبداللہ بن عباس سے جا کر کہو کہ اگر ہر آدمی کو اس وجہ سے عذاب ہوگا کہ وہ اس چیز سے خوش ہوتا ہے جو اسے ملتی ہے اور اس کی