مباحث فی علوم القرآن

مذکورہ روایت میں وضاحت ہو رہی ہے کہ یہ آیت ان تینوں آیات کے آخر میں نازل ہوئی جن میں مردوں کے ساتھ عورتوں کا بھی ذکر کیا گیا۔ یعنی عورتوں کے ذکر میں نازل ہونے والی آیات میں یہ آیت سب سے آخری ہے۔ آٹھواں قول:… صحیح بخاری اور دیگر کتابوں میں ہے سیدنا عبداللہ بن عباس رضی اللہ عنہ فرماتے ہیں : آیت ﴿وَ مَنْ یَّقْتُلْ مُؤْمِنًا مُّتَعَمِّدًا فَجَزَآؤُہٗ جَہَنَّمُ﴾ (النساء: ۹۳) سب سے آخر میں نازل ہوئی اور اسے کسی چیز نے منسوخ نہیں کیا۔ سیدنا ابن عباس رضی اللہ عنہما کے قول : ’’ اسے کسی چیز نے منسوخ نہیں کیا، میں دلیل ہے کہ جان بوجھ کر کسی مومن کو قتل کرنے کے حکم کے متعلق یہ سب سے آخری آیت ہے۔ نواں قول:… امام مسلم رحمہ اللہ سیدنا عبداللہ بن عباس رضی اللہ عنہ سے روایت کرتے ہیں کہ انہوں نے فرمایا: سب سے آخری سورت جو نازل ہوئی وہ ﴿اِِذَا جَآئَ نَصْرُ اللّٰہِ وَالْفَتْحُ.﴾ ہے۔ اس روایت کو اس بات پر محمول کیا گیا ہے کہ یہ وہ آخری سورت ہے جو نبی صلی اللہ علیہ وسلم کی وفات کی خبر دینے والی ہے، جیسا کہ بعض صحابہ اس بارے یہی سمجھتے تھے، یا پھر سورتوں میں سب سے آخر میں نازل ہونے والی سورت ہے۔ ان تمام اقوال میں کوئی بھی چیز نبی صلی اللہ علیہ وسلم سے مرفوع ثابت نہیں ہے، ہر ایک نے جو بھی کہا وہ اپنے گمان اور اجتہاد سے کہا ہے۔ یہ بھی ہوسکتا ہے کہ ان میں سے ہر ایک نے وہی کچھ بیان کر دیا جو اس نے سب سے آخر میں رسول اللہ صلی اللہ علیہ وسلم سے سنا یا کسی خاص قانون کے لحاظ سے اسے آخر میں نازل ہونے والی آیت قرار دیا، یا یہ کہ سب سے آخر میں یہ سورت نازل ہوئی، چناں چہ تمام باتوں کو ہم نے بیان کر دیا ہے۔ لیکن آیت ﴿اَلْیَوْمَ اَکْمَلْتُ لَکُمْ دِیْنَکُمْ وَ اَتْمَمْتُ عَلَیْکُمْ نِعْمَتِیْ وَ رَضِیْتُ لَکُمُ الْاِسْلَامَ دِیْنًا﴾ (المائدہ: ۳)حجۃ الوداع کے موقع پر میدانِ عرفات میں نازل ہوئی، ظاہری لحاظ سے تو اس سے یہی معلوم ہو رہا ہے کہ فرائض واحکام کی تکمیل ہو چکی ہے، جب کہ آیت ربا، آیت دین اور آیت کلالہ کے بارے آخری نزول ہونے کے متعلق کلام گزر چکی ہے۔ اسی لیے علماء نے اس آیت سے دین کی تکمیل کی طرف اشارہ سمجھا ہے کہ اللہ تعالیٰ نے انہیں مکہ مکرمہ پر غلبہ