مباحث فی علوم القرآن

چوتھا قول:… آیت کلالہ سب سے آخر میں نازل ہوئی، امام بخاری ومسلم رحمہم اللہ بیان کرتے ہیں کہ سیدنا براء بن عازب رضی اللہ عنہ نے فرمایا: سب سے آخر میں آیت ﴿یَسْتَفْتُوْنَکَ قُلِ اللّٰہُ یُفتِیْکُمْ فِی الْکَلٰلَۃِ﴾ (النساء: ۱۷۶) نازل ہوئی تھی۔ اس قول کا مطلب یہ ہے کہ احکامِ وراثت میں سب سے آخر میں یہ آیت اتری۔ پانچواں قول:… مستدرک حاکم میں ہے سیدنا ابی بن کعب رضی اللہ عنہ فرماتے ہیں : سب سے آخر میں ﴿لَقَدْ جَآئَ کُمْ رَسُوْلٌ مِّنْ اَنْفُسِکُمْ……﴾ (التوبہ: ۱۲۸۔۱۲۹) سے آخر سورت تک نازل ہوئیں ۔ اس کا مطلب یہ ہے کہ سورت توبہ میں سب سے آخر میں یہ نازل ہوئیں ۔ امام احمد بن حنبل رحمہ اللہ کے بیٹے عبداللہ رحمہ اللہ نے زوائد المسند میں ابی بن کعب رضی اللہ عنہ سے روایت کی ہے کہ رسول اللہ صلی اللہ علیہ وسلم نے انہیں یہ دو آیات ﴿لَقَدْ جَآئَ کُمْ رَسُوْلٌ مِّنْ اَنْفُسِکُمْ……﴾ سے لے کر ﴿وَ ہُوَ رَبُّ الْعَرْشِ الْعَظِیْمِ.﴾ تک سورۃ براء ت کے آخر میں پڑھائیں ۔ چھٹا قول:… سورت مائدہ سب سے آخر میں نازل ہوئی۔ اس بارے امام ترمذی اور حاکم رحمہم اللہ نے سیدہ عائشہ رضی اللہ عنہا سے بات نقل کی ہے لیکن اس کا جواب یہ دیا گیا کہ حلال وحرام کے بارے سب سے آخر میں یہ سورت نازل ہوئی تھی، اس میں احکام کو منسوخ نہیں کیا گیا۔ ساتواں قول:… ابن مردویہ نے مجاہد رحمہ اللہ کے طریق سے امِ سلمہ رضی اللہ عنہا سے نقل کیا ہے، وہ فرماتی ہیں : سب سے آخر میں آیت ﴿فَاسْتَجَابَ لَہُمْ رَبُّہُمْ اَنِّیْ لَآ اُضِیْعُ عَمَلَ عَامِلٍ مِّنْکُمْ ……﴾ (آل عمران: ۱۹۵) نازل ہوئی۔ اس کا قصہ یوں ہے کہ انہوں نے عرض کی: اے اللہ کے رسول! میں دیکھتی ہوں کہ اللہ تعالیٰ مردوں کا تذکرہ تو کرتے ہیں ، لیکن عورتوں کا ذکر نہیں کرتے تو یہ آیت نازل ہوئی، ﴿وَ لَا تَتَمَنَّوْا مَا فَضَّلَ اللّٰہُ بِہٖ بَعْضَکُمْ عَلٰی بَعْضٍ﴾ (النساء: ۳۲) اور یہ آیت بھی اتری ﴿اِنَّ الْمُسْلِمِیْنَ وَ الْمُسْلِمٰتِ……﴾ (الاحزاب: ۳۵) اور اس بارے میں سب سے آخری آیت نازل ہوئی۔ چناں چہ مردوں کے بارے نازل ہونے والی آیات کے بعد سب سے آخر میں یہ آیت اتری۔