مولانا احمد دین گکھڑوی

آہن گری وہ کام ہے، جس کا خود قرآن نے ذکر کیا ہے۔حضرت داؤد آہن گر تھے اور اللہ کے برگزیدہ پیغمبر۔! قرآن مجید میں ان کی اس صنعت کا خاص طور پرذکر فرمایاگیا ہے اور ارشاد ہے: ﴿وَ اَلَنَّالَہُ الْحَدِیْدَ﴾[سبا: ۱۰] ’’اور ہم نے ان کے لیے لوہا نرم کردیا۔‘‘ اس کے ساتھ ہی اللہ تعالیٰ نے ان کو حکم دیا: ﴿اَنِ اعْمَلْ سٰبِغٰتٍ وَّ قَدِّرْ فِی السَّرْدِ﴾[سبا: ۱۱] یعنی لوہے کی زرہیں اس انداز سے بناؤ کہ پہننے والے کے جسم پر پوری آئیں اور ان کی کڑیاں بالکل درست ہوں، چھوٹی بڑی نہ ہوں، پہننے والے کو اس میں کسی قسم کی تکلیف نہ ہو۔ لوہے کی زرہیں زمانہ جنگ میں اور خطرے کے موقعے پر دشمن سے بچاؤ کے لیے پہنی جاتی تھیں۔حضرت داؤد کا ایجاد کردہ یہ سلسلہ اب بھی چلتا ہے۔ قرآن کی رو سے کہنا چاہیے کہ مولانا احمد الدین گکھڑوی کے اسلاف، ان کے خاندان کے افراد اور خود ان کا پیشہ حالات کی رفتار کے مطابق پیغمبرانہ پیشہ تھا۔اسے یوں بھی کہا جاسکتا ہے کہ پیشے کے اعتبار سے ان کا خاندان حضرت داؤد سے تعلق رکھتا ہے اور یہ لوگ انہی کی آل اولاد ہیں جو کسی زمانے میں برصغیر میں آبسے! غرض جن لوگوں کو آج برصغیر کی بولی میں لوہار اور عربی زبان میں حداد کہا جاتا ہے، وہ معمولی حیثیت کے لوگ نہیں ہیں۔ان کا مرتبہ ان کے کام اور پیشے کے اعتبار سے بہت بڑا ہے۔یہ لوگ بے حدمشقت کے ساتھ وہ کام کرتے ہیں جو اور کوئی نہیں کرسکتا۔لوگ اس کام کے لیے ان کے محتاج ہیں۔اس پیشے سے مسلمان بھی بہت بڑی تعداد میں منسلک ہیں اور غیر مسلم بھی!