محدث شمارہ 42

اِسے طِیْنٍ لَّازِبٍ (پ۲۳۔ الصفت۔ ع۱)چپچپی مٹی سے تعبیر فرمایا ہے۔ لازب سے مراد وہ مٹی ہے جو خوب چپکتی ہے، یہ عموماً جوہڑوں کے کناروں اور تالابوں کی تہوں میں ہوتی ہے، دوسرے مقام پر فرمایا۔ ﴿مِنْ صَلْصَالٍ مِّنْ حَمَأٍ مَّسْنُوْنٍ﴾ (پ۱۴۔ الحجر۔ ع۳)کالے (اور)سڑے ہوئے گارے سے جو (سوکھ کر)کھن کھن بولنے لگتا ہے۔ سورۂ رحمٰن میں فرمایا: ﴿مِنْ صَلْصَالٍ كَالْفَخَّارِ ﴾ (پ۲۷۔ الرحمٰن۔ ع۱)ایسی کھنکھناتی مٹی سے جیسے ٹھیکرا۔ امام بخاری رحمہ اللہ لکھتے ہیں : صلصال، طین، خلط برمل فصلصل کما صلصل الفخار (کتاب الانبیاء باب خلق آدم) گارا جس میں ریت ملی ہو، سو وہ آواز دیتا ہے جیسے ٹھیکری آواز دیتی ہے۔ کچھ لوگ کہتے ہیں : بلکہ یہ ایک نوع کی تخلیق ہوئی جسے نوع انسان کہا گیا ہے۔ لہٰذا آدم سے یہ مراد نہیں کہ وہ سب سے پہلا انسان تھا مگر ہمارے نزدیک یہ مغربی افکار کی خوشہ چینی ہے۔ اصل میں یہی آدم وہ پہلا انسان ہے جو کسی مغربی جرثومہ کی ارتقائی شکل نہیں ہے بلکہ براہِ راست مٹی سے تخلیق ہوا۔ چنانچہ اوپر کی سطور میں اِسی آدم کے جسد کا ذِکر کیا گیا ہے جس میں حق تعالیٰ نے روح پھونکی اور ملائکہ اس کے حضور جھکے۔ ﴿وَاِذْ قَالَ لِلْمَلٰٓئِکَۃِ اِنِّیْ خَالِقٌ بَشَرًا مِّنْ صَلْصَالٍ حَمَأٍ مَّسْنُوْنٍ۔ فَاِذَا سَوَّیْتُہ وَنَفَخْتُ فِیْہِ مِنْ رُّوْحِیْ فَقَعُوْا لَہ سٰجِدِیْنَ ﴾(پ۱۴۔ الحجر۔ ع۳) اور یاد کرو وہ وقت جب آپ کے رب نے فرشتوں سے کہا ہ میں کالے (اور)سڑے ہوئے گارے سے جو (سوکھ کر)کھن کھن بولنے لگتا ہے۔ ایک بشر پیدا کرنے والا ہوں ، تو جب میں اس کو پورا بنا چکوں اور اس میں اپنی (طرف)سے روح پھونک دوں تو تم اس کے حضور جھک جانا۔ ابلیس نے بھی اِسی انسانِ اوّل (آدم)کے حجور جھکنے سے انکار کر دیا تھا۔ ﴿قَالَ اَنَا خَیْرٌ مِّنْہُ خَلَقْتَنِیْ مِنْ نَّارٍ وَخَلَقْتَہ مِنْ طِیْنٍ﴾ (پ۲۳۔ صٓ۔ ع۵) (ابلیس)بولا، میں اس سے بہتر ہوں مجھے آپ نے آگ سے بنایا، اسے مٹی سے۔ ﴿لَمْ اَکُنْ لِّاَسْجُدَ لِبَشَرٍ خَلَقْتَہ مِنْ صَلْصَالٍ مِنْ حَمَأٍ مَّسْنُوْنٍ ﴾(پ۱۴۔ الحجر۔ ع۳) اور یہی وہ آدم ہے جس کو رب نے اپنے مبارک ہاتھوں سے بنایا۔ ﴿لِمَ خَلَقْتُ بِیَدَیَّ ﴾(پ۲۳۔ ص۔ ع۵)