محدث شمارہ 336

اور حکومت کا حق بھی دولت مند کو تھا۔چنانچہ جب اُنہوں نے اپنے زمانہ کے نبی علیہ السلام کے ذریعہ سے مانگ کر طالوت پایا تو کہنے لگا: ﴿قَالُوْا اَنّٰی یَکُوْنُ لَہُ الْمُلْکُ عَلَیْنَا وَنَحْنُ أَحَقُّ بِالْمُلْکِ مِنْہُ وَلَمْ یُؤتَ سَعَۃً مِّنَ الْمَالِ ﴾ (البقرۃ:۲۴۷) ’’ہم پر حکومت کا حق اسے کہاں سے مل گیا۔ حالانکہ حاکم ہونے کے حق دار اس سے زیادہ ہم ہیں اور اسے مالی وسعت نہیں دی گئی۔‘‘ قریش کا بھی معیار توقیر مال تھا۔ سورۃ القلم:۱۰تا ۱۴ پڑھو۔ ایک شخص کا نام لیے بغیر اخلاقی حلیہ بیان کیا گیا ہے۔ ہمیں اس کے نام کی جستجو نہ کرنی چاہیے۔ نہایت بد اَطوار ہونے کے باوجود وہ شخص مقتداے قوم تھا، اللہ نے ایسے بد اَطوار کی اطاعت سے منع کیا ہے۔ وہ صرف اس لیے قوم کا مقتدا تھا : ﴿اَنْ کَانَ ذَا مَالٍ وَّ بَنِیْنَ﴾ (القلم :۱۴) ’’وہ مال اور اولاد والا تھا۔‘‘ قرآنِ کریم میں کہیں آیت اس مضمون کی تو نہیں ہے کہ دولت مند کسی صورت میں مستحق توقیر نہیں ہوتا، لیکن دولت کو معیارِ توقیر بنانے کے خلاف جا بجا اِشارے ملتے ہیں ۔ سورۃ العلق میں فرمایا:﴿کَلَّا إِنَّ الْاِنْسَانَ لَیَطْغٰی٭ اَنْ رَّاٰہُ اسْتَغْنٰی﴾ (العلق:۶،۷) ’’ زنہار! کیونکہ انسان سرکش ہو جایا کرتا ہے جب کہ خود کو دیکھ لیتا ہے کہ غنی ہو گیا ہے۔‘‘ قرآنِ کریم کی چار آتیوں زخرف :۲۳،سبا:۳۴، مؤمنون :۶۴ ، اور اسرائیل :۱۶ میں گناہ گاروں کی ایک قسم کا ذکر مُترفین کے نام سے آتا ہے۔یہ لفظ ترف سے مشتق ہے ، عبرانی لفظ ترافیم اسی سے بنا ہے۔گھریلو بتوں کو، جو لکڑی کے ہوتے تھے اور ان پر سونے چاندی کی خول چڑھی ہوتی تھی، ترافیم کہتے تھے۔ ترف کے معنی عبرانی میں ناز ونعمت اور آرام میں پلنا ہے۔اصلی مفہوم سونے چاندی میں منڈھا ہونا۔عربی میں ترفۃ کے معنی ہیں : چہرہ کی چمک دمک بوجہ خوشحالی۔ اِتراف کے معنی ہیں : ناز ونعمت میں پالنا۔ مترف کے معنی ہیں : وہ جسے ناز ونعمت سے پالا گیا ہو۔ اپنے دست و بازو سے کما کے دولت مند ہونے والے کو مترف نہیں کہتے تھے۔ مترف وہ دولت مند ہے جو دولت میں پلا ہو۔زخرف :۲۳ اور سبا:۳۴ میں بتایا گیا ہے کہ انبیا کرام کی مخالفت ہمیشہ مترفین نے کی۔ مؤمنون:۶۴ میں مترفین کے مستحق عذاب