محدث شمارہ 304

حدیث وسنت ڈاکٹر حافظ عبد الرشید اظہر مکتب الدعوۃ، اسلام آباد نبی کریم صلی اللہ علیہ وسلم پر ایمان کے تقاضے اور مقامِ نبوت صلی اللہ علیہ وسلم حدیث ِنبوی صلی اللہ علیہ وسلم کی مستند ترین کتاب ’صحیح بخاری‘ کے اختتام کے موقعہ پر ’تقریب ِصحیح بخاری‘ کا انعقاد دینی مدارس کی ایک دیرینہ روایت ہے۔ اِمسال جامعہ لاہور الاسلامیہ میں مؤرخہ ۶ ستمبر کو یہ تقریب منعقد ہوئی جس کے بعد جامعہ کی آخری کلاس مکمل کرنے والے طلبہ کو دستارِ فضیلت سے سرفراز کیا گیا۔اس مرحلہ پر شیخ الجامعہ مولانا حافظ عبد الرحمن مدنی اورشیخ الحدیث مولانا حافظ ثناء اللہ مدنی حفظہم اللہ کے پر مغز اور مؤثر خطابات بھی ہوئے۔ تقریب کے بعد جامعہ کے شعبہ کلیہ القرآن الکریم کے زیر اہتمام ’محفل حسن قراء ۃ‘کا بھی انعقاد ہوا۔ زیر نظر تحریر اسی تقریب کا مرکزی خطاب ہے جسے ملک کامران طاہر نے کیسٹ سے تحریرکی صورت میں ترتیب دیا ہے۔ محترم ڈاکٹر عبد الرشید اظہر حفظہ اللہ کے اس خطاب میں حجیت ِحدیث اور منصب ِرسالت صلی اللہ علیہ وسلم کو ایک نئے اُسلوب میں پیش کیا گیا ہے۔اللہ تعالیٰ ہمیں اِن تقاضوں سے عہدہ برآ ہونے کی توفیق مرحمت فرمائے۔ ح م الحمد اللّٰه حمدًا کثیرًا طیبًا مبارکًا فیہ نحمدُہ ونستعینُہ،أما بعدُ : اللہ کی حمدوثنا جیسے اس کے شایان شان ہے اور صلوٰۃ وسلام رسول اللہ صلی اللہ علیہ وسلم کی ذاتِ گرامی پر … حمدوثنا اور صلوٰۃ وسلام کے بعد قابل احترام شیخ الحدیث مولانا حافظ ثناء اللہ مدنی، محترم جناب حافظ عبد الرحمن مدنی، مولانا محمد رمضان سلفی ومحترم مولانا عبد السلام فتح پوری حفظہ اللہ، و عزیزانِ گرامی وسامعین محترم ! آپ سب جانتے ہیں کہ اللہ ربّ العزت کی ذاتِ گرامی پر ایمان مرکب ہے۔ ایمان کا مرکب ہونا دو اعتبار سے ہے: ایک اس لئے کہ دل کے یقین، زبان کے اقرار اور اعضاء و جوارح کے عمل کانام ایمان ہے۔ یہ تینوں چیزیں ہوں تب ایمان متحقق ہوتاہے، ان میں سے ایک بھی رہ جائے تو ایمان مکمل نہیں ہوتا، اس اعتبار سے بھی ایمان مرکب ہے۔ دوسرے اس اعتبارسے بھی کہ اللہ احکم الحاکمین کے ان گنت او ربے شمار اسماے حسنیٰ ہیں ، پھر اللہ ربّ العزت کی اَن گنت اور بیشمار صفاتِ عُلیٰ ہیں ۔ ہر وہ نام جو انسان کے علم میں