محدث شمارہ 294

اس سے پتہ چلتا ہے کہ حالیہ زلزلہ سرتاستر قیامت ہی قیامت ہے۔ اس میں قیامت کے تینوں مراحل پورے ہوتے نظر آتے ہیں: ایک تو قیامتِ صغریٰ جو موت کا شکار ہونے والوں کے لئے ہے اور دوسری قیامتِ وسطیٰ جو مختلف عذابوں کی شکل میں نازل ہوتی ہے اور تیسری قیامتِ کبریٰ کی یاد دہانی، اس اعتبار سے یہ زلزلہ گویا مجسم قیامت ہے، اور اس سے عبرت پکڑنے والوں کو عبرت پکڑنا چاہئے!! اللہ کی قدرت کی یاد دہانی: اس زلزلہ کے بعد آج کے ترقی یافتہ انسان نے دیکھا کہ وہ کس طرح اللہ کے سامنے محتاج ہے، لیکن قرآن کریم میں جب یہ باتیں اللہ تعالیٰ انسان کو یاد دلاتے ہیں تو غفلت کا شکارانسان اس کو بے کار راوے کہہ کر نظر انداز کرنے اور ذہن سے جھٹکنے کی کوشش کرتا ہے۔ قرآن میں اللہ تعالیٰ کی قدرت کا بیان پڑھئے اور اپنے ذہنوں میں موجود غرور و تکبر کو اور سائنس و ٹیکنالوجی کے دھوکے کو جھٹک دیجئے، کائنات میں ہر طرف ربِّ قدیر کی قدرت کے نشانات دکھائی دیتے ہیں، لیکن ربّ سے غافل انسان اپنے تئیں اُنہیں ایک خود کار نظام قرار دے کر غور و فکر کی زحمت نہیں کرتا۔ لیکن اللہ نے یہ یاد دہانیاں اپنی کتاب میں روزِ اوّل سے لکھ چھوڑی ہیں۔ یہ زلزلہ اللہ کی قدرت، قوت اور قہر و جبروت کا ایک عظیم مظہر ہے جس کی شان یہ ہے کہ ﴿ إنَّ اللّٰهَ يُمْسِكُ السَّمٰوٰتِ وَالْأَرْضَ أَنْ تَزُوْلَا وَلَئِنْ زَالَتَا إنْ أَمْسَكَھُمَا مِنْ أَحَدٍ مِنْ بَعْدِهِ﴾ (فاطر: ۴۱) ’’وہ اللہ ہی ہے جو آسمانوں اور زمین کو ٹل جانے سے روکے ہوئے ہے اور اگر وہ ٹل جائیں تو الله كے بعد كوئی دوسرا انہيں تھامنے والا نہیں ہے۔ بے شک اللہ بڑا حلیم اور درگزر فرمانے والا ہے۔‘‘ اللہ تعالیٰ انسانوں پر اپنا انعام ذکر کرتے ہیں کہ اللہ نے انسان کے لئے زمین کو پھیلا کر سیدھا اور جائے قرار بنایا ہے۔ (الحجر: ۱۹) اور پہاڑوں کو زمین میں میخیں بنایا تاکہ وہ زمین ٹکی رہے۔ (النحل: ۱۵) ٭ یہ زمین و آسمان اللہ کے ہی مطیع و فرمانبردار ہیں: