محدث شمارہ 294

کو حقیقی عذاب کا مستحق بنا لیں۔ آخر کار حقیقی فیصلہ روزِ قیامت ہی ہونا ہے!! زلزلہ۔۔۔۔ مجسم عبرت اور قیامت کی یاد دہانی: دنیا میں اللہ کے عذاب کی مختلف شکلیں ہیں اور قابل غور امر یہ ہے کہ گذشتہ چند سالوں سے یہ آفات ایک تسلسل کے ساتھ آرہی ہیں۔ قربِ قیامت یوں بھی زلزلوں کی کثرت کی نبی کریم صلی اللہ علیہ وسلم نے پیش گوئی فرمائی ہے۔ (صحیح بخاری: ۱۰۳۶) پھر بھی لوگوں کا اللہ کی طرف رجوع روز بروز کم سے کم ہوتا جا رہا ہے۔ عذابِ الٰہی زلزلوں کی شکل میں ہو یا تیز ہوا، تیز چیخ اور سیلاب وغیرہ کی صورت میں، ہر ایک میں عقل مندوں کے لئے عبرت کا سامان موجود ہے۔ قرآن کریم میں عذاب کی ان مختلف شکلوں کا تذکرہ کرتے ہوئے فرمایا گیا ہے: ﴿ فَكُلًا أَخَذْنَا بِذَنْبِهِ َمِنْھُمْ مَنْ أَرْسَلْنَا عَلَيْهِ حَاصِبًا وَمِنْھُمْ مَنْ أَخَذَتْهُ الصَّيْحَةُ وَمِنْھُمْ مَنْ خَسَفْنَا بِهِ الأرْضَ وَمِنْھُمْ مَنْ أَغْرَقْنَا وَمَا كَانَ اللّٰهُ لِيَظْلِمَھُمْ وَلَكِنْ كَانُوْا أَنْفُسَھُمْ يَظْلِمُوْنَ ﴾(العنکبوت: ۴۰) ’’آخر کار ہر ايك كو ہم نے اس كے گناه ميں پکڑا۔ پھر ان میں سے کسی پر ہم نے پتھراؤ کرنیوالی ہوا بھیجی اور کسی کو ایک زبردست دھماکے نے آلیا اور کسی کو ہم نے زمین میں دھنسا دیا اور کسی کو غرق کر دیا۔ اللہ ان پر ظلم کرنے والا نہ تھا، مگر وہ خود ہی اپنے اوپر ظلم کر رہے تھے۔‘‘ جن دنوں یہ قدرتی آفات تازہ ہوں، ان دنوں انسانوں کو اللہ کی یاد آہی جاتی ہے اور اس کی قدرت کے آگے سر جھکانے کے سوا کوئی چارہ نہیں ہوتا، وگرنہ بے شمار لوگ ایسے بھی ہیں جو قیامت کی یاد سے ہی غافل رہتے ہیں۔ ان کے ذہن ہی اس امر کو تسلیم نہیں کرتے کہ اس قدر منظم و مربوط، جدید ٹیکنالوجی سے آراستہ پیراستہ شہر لمحوں میں کیسے مٹی کے ڈھیر بن سکتے ہیں!! لیکن یہ آفات انسان کو یاد دلاتی ہیں کہ سب سے برتر قوت اللہ کی ہے، وہ چاہے تو لمحے بھر میں قیامتِ صغریٰ بپا کر سکتا ہے۔ گذشتہ ایک سال میں تسلسل سے آنے والے یہ زلزلے جن سے آج دنیا خوفزدہ ہے، ہمیں اُس قیامت کے وعدے کی طرف لے جا رہے ہیں جو خود بھی ایک زلزلے کی طرح اچانک رونما ہو گی۔ قرآن کریم میں قیامت کا تذکرہ کرتے ہوئے فرمایا گیا ہے: