محدث شمارہ 286

برطانوی سامراج نے ان مدارس کو ختم کرنے کی بہت کوشش کی اور اس حد تک انہیں پیچھے دھکیلا کہ انہیں ان کے قابل ذکرکردار کی اُمید نہ رہی لیکن آج ان مدارس سے وابستہ لوگوں نے اپنی خدمات کے بل بوتے پریہ ثابت کردکھا یا کہ اب بھی اسلام کے سب سے بڑے قلعے یہی ہیں اور دورِ حاضر کی سب سے بڑی قوت انہی سے خائف ہے۔ ہماری رائے میں موجودہ حالات میں مدارس کو ایک بار پھر وہی چیلنج درپیش ہیں جو برطانوی سامرا ج کے دو رمیں پیش آئے تھے۔ مدارس کو اپنی بقا کی جنگ دوبارہ لڑنا ہوگی، کیونکہ اس دور کا کفر ان کی کارکردگی پر بری طرح خندہ زن ہے اور اُنہیں نیست ونابود کرنے پر تلا ہوا ہے۔ گذشتہ سال مارچ میں عراق کے دورے پر آئے ہوئے امریکی عہدیدار نے کہا : ”پاکستان کے دینی مدرسے انتہا پسندی کو فروغ دینے کا بڑا ذریعہ ہیں “ امریکہ کوعراق سے نہیں اُن مدرسوں سے زیادہ خطرہ ہے جہاں 7 لاکھ طلبہ زیر تعلیم ہیں ! ”امریکہ کے سنٹر فار سٹریٹیجک اینڈ انٹرنیشنل افیرز کے ڈائریکٹر انور ڈی برگ نے ایشین ٹائمز کو انٹرویو دیتے ہوئے پاکستان کے دینی مدرسوں کے بارے میں کہا کہ امریکہ نے 1980ء کے عشرے میں کوتاہ نظری پر مبنی جو پالیسیاں تشکیل دی ، ان کے نتیجے میں پاکستان میں دینی مدرسوں کو فروغ حاصل ہوا ہے۔ اس وقت پاکستان کے 10 ہزار مدارس میں 7 لاکھ طلبہ زیر تعلیم ہیں اور سعودی عرب اپنے شہریوں کے ذریعے ان کو 30 کروڑ ڈالر کی سالانہ امداد دے رہا ہے۔“ (روزنامہ ’جنگ‘ لاہور: 10/مارچ 2004ء) امریکی نائب وزیر دفاع اپنی تقریر میں کہتے ہیں کہ ”اسلامی دینی مدارس لاکھوں مسلم بچوں کو انتہاپسندانہ دینی تعلیم پر اُبھارتے ہیں ۔ ان کی سرگرمیوں کو روکنے کا طریقہ یہ ہے کہ ان کے بجٹ کی ترسیل پرقدغنیں عائد کی جائیں ، اس سے بھی بہتر ذریعہ یہ ہے کہ مقامی طور پر ان مدارس کے مخالف افراد، رجحانات او راداروں کو تقویت اور مدد پہنچائی جائے تاکہ وہ انتہاپسندی کے سرچشموں کا مقابلہ کرسکیں ۔“ (’اسلامی دینی تعلیم پر امریکی یلغار‘ مجلہ فقہ ِاسلامی، فروری 2005ء ، ص 52) امریکی کانگریس نے مدارس کو مالی امداد کاسلسلہ روکنے کے لئے کانگریس ارکان پر مشتمل ایک خصوصی کمیٹی تشکیل دی ہے جنہوں نے اس سلسلے میں مختلف اقدامات کیے ہیں ۔ ان اقدامات میں سے یہ ہے کہ سعودی عرب پر دینی مدارس سے تعاون کرنے والے اہم اداروں کو