محدث شمارہ 22

غیر مسلم کا خیال ہے: ’’قرآن مذہبی قواعد و احکام ہی کا مجموعہ نہیں بلکہ وہ ایک عظیم الشان ملکی اور تمدنی نظام پیش کرتا ہے۔‘‘ مرتبِ کتاب کی سعی قابل قدر ہے تاہم مزید تلاش و جستجو سے غیر مسلموں کے لکھے ہوئے مضامین شامل کیے جا سکتے تھے۔ ہندوؤں میں گاندھی جی، سر وجنی نائیڈو اور سادھوئی کے علاوہ سوامی لکشمن، لالہ کنور سین (سابق چیف جسٹس جموں و کشمیر) لالہ کرم چند ایڈووکیٹ اور ایسے ہی کئی دوسرے افراد کے خیالات جمع کیے جا سکتے تھے۔ اول الذکر سوامی لکشمن نے تو نبی اکرم صلی اللہ علیہ وسلم کی سوانح’’عرب کا چاند‘‘ لکھی ہے۔ کتاب کی ترتیب میں چند واضح خامیاں موجود ہیں ۔ مثال کے طور پر جس حصۂ کتاب میں نبی اکرم صلی اللہ علیہ وسلم کے بارے میں غیر مسلموں کی آراء و خیالات پیش کیے گئے ہیں ۔ اسی میں امام غزالی رحمہ اللہ ، مجدد الف ثانی رحمہ اللہ ، امام بن قیم رحمہ اللہ ، شاہ ولی اللہ محدث دہلوی رحمہ اللہ اور شاہ اسماعیل شہید رحمہ اللہ کی تحریریں پیش کر دی گئی ہیں جو واضح طور پر غیرمسلموں کے حلقے سے نہیں ہیں ۔ اسی طرح بعض ابواب سرے سے موضوع سے غیر متعلق ہیں ۔ امید ہے آئندہ ایڈیشن میں یہ خامیاں دور کر دی جائیں گی۔ ......٭٭٭٭...... کتاب : مقالات ترتیب : رشید احمد طباعت : عمدہ ٹائپ صفحات : 108 قیمت : 6 روپے ناشر : مکتبہ علمیہ 15۔ لیک روڈ لاہور امسال نزولِ قرآن کریم کی تقریب سعید پر عجائب گھر لاہور میں مصحف مکرم کے قلمی اور نادر نسخوں کی 26 رمضان تا 15 شوال نمائش رہی۔ اس نمائش کے موقع پر عجائب گھر کے ڈائریکٹر سید محمد تقی کاظمی صاحب نے ملک کے چیدہ چیدہ اہل قلم سے قرآن سے متعلق مقالات لکھنے کی فرمائش کی۔ چنانچہ قرآن کی تدوین، کتابت اور تفہیم جیسے موضوع پر سید حسین مرتضیٰ حسین فاضل، ڈاکٹر محمد عبد اللہ چغتائی، حافظ احمد یار، ڈاکٹر عابد احمد عابدؔ اور چند دوسرے حضرات نے مقالات لکھے۔ کل دس مقالات اس مجموعے میں شامل ہیں ۔ الحاج رشید احمد صاحب نے مقالات کی ترتیب میں حسنِ ذوق کا اچھا ثبوت دیا ہے۔ مقالات مختصر اور جامع ہیں۔