محدث شمارہ 16

مکہ آرہا ہے۔ کوئی حرمین سے کوفہ و بصرہ کا رُخ کر رہا ہے تو دوسرا عراق سے حجاز کے لئے رختِ سفر باندھے ہوئے ہے۔ اسی تحصیلِ علم کے شوق میں اگر کچھ لوگ شام، افریقہ، خراسان، جبال، آذر بائیجان سے آرہے ہیں تو دوسرے تبلیغ دین کے لئے ان علاقوں کا رُخ کر رہے ہیں ۔ گویا آفاقِ عالم میں علم کے چشمے جاری ہو گئے اور پیاسے سفر کی کلفتوں اور دیار کی الفتوں کو پسِ پشت ڈالتے ہوئے تشنگی بجھانے کے لئے روانہ ہو گئے۔ اس دورِ تابعین میں عالمِ اسلام کے طول و عرض میں وہ لہر پہر لگی کہ ہر ایک دیوانہ وار اس کی طرف چلا آیا۔ حتیٰ کہ سعید بن المسیب سے روایت ہے کہ انہوں نے ایک ایک حدیث کے لئے طول طویل پیادہ پا سفرکیے۔ [1] صحابہ کرام اور بڑے بڑے تابعین نے طالبانِ علم سے نہ تو کسی قسم کا بخلِ علمی روا رکھا اور نہ ہی ان کی خدمت اور خیر خواہی میں کوئی کمی روا رکھی۔ انہوں نے نبی صلی اللہ علیہ وسلم کی اس نصیحت کی خوب حفاظت کی استوصوا بھم الخیر یعنی طلب علم کے لئے آنے والوں کے بارے میں میری طرف سے بھلائی کی وصیت پلے باندھ لو۔ رحلہ محدثین و مفسرین: اگرچہ حدیث قرآن کی ہی تفسیر کا نام ہے۔ کیونکہ اس بات سے کوئی صاحبِ فہم و بصیرت مسلمان انکار نہیں کر سکتا کہ کتاب اللہ کی ہی عملی تعبیر اور اسی کا کامل و مثالی نمونہ سنتِ رسول صلی اللہ علیہ وسلم ہے اور جس طرح کتاب اللہ کی قراءۃ و تلاوۃ کے اعتبار سے اسے قرآن کہتے ہیں اسی طرح سنت (طریقۂ نبوی صلی اللہ علیہ وسلم ) کی روایت کے لحاظ سے اسے حدیث کہتے ہیں ۔ [2]

[1] علمائے سلف و نابینا علماء بحوالۃ تذکرۃ الحفاظ للذہبی جلد ۱، ص ۴۸ [2] واضح رہے کہ بہت جامع کلمے صاحب جوامع الکلم الصادق المصدوق محمد صلی اللہ علیہ وسلم کے ہیں جو آپ کے فرمان ’’ترکت فیکم امرین لن تضلوا ما تمسکتم بھما، کتاب اللہ وسنتی‘‘ میں مذکور ہیں یعنی کتاب و سنت، کیونکہ جس طرح قرأۃ کے اعتبار سے ان آیات کا کتاب اللہ سے خارج ہونے کا وہم ہو سکتا ہے جن کی قراءۃ منسوخ ہے۔ اسی طرح ان احادیث کے بھی سنت کے تحت آجانیکا وہم پڑ سکتا ہے جو خالص دنیاوی امور سے متعلق ہیں۔ حالانکہ وہ شریعت نہیں جس کی تفصیل شاہ ولی اللہ دہلوی نے بیان فرمائی ہے۔ ملاحظہ ہو حجۃ اللہ البالغہ ص ۱۲۸۔ جلد ۱ (ادارۃ الطباعۃ المنیریہ۔ مصر)