منہاج المسلم

نیز عمر رضی اللہ عنہ نے صدقہ وصول کرنے والے کو أَکُولَہ،الرُّبیَّ مَاخِضْ اور فَحلُ الْغَنم لینے سے منع کر دیا تھا۔[1] پھلوں اور غلہ جات کی زکاۃ: غلہ اور پھلوں میں شرط یہ ہے کہ پھل اور دانہ پختگی کو پہنچ جائیں،یعنی پھل زرد یا سرخ ہوجائے اور دانہ نکالا جاسکے۔اسی طرح انگور اور زیتون بھی جب عمدہ اور قابل استعمال ہو جائیں،اس لیے کہ اللہ سبحانہ وتعالیٰ کا ارشاد ہے:﴿وَآتُوا حَقَّهُ يَوْمَ حَصَادِهِ﴾’’اور اس کی کٹائی کے دن اس کا حق دے دو۔‘‘[2] اس کا نصاب پانچ وسق ہے۔ایک وسق ساٹھ صاع کا ہوتا ہے اور ایک صاع چار مد کا،اس لیے کہ رسول اللہ صلی اللہ علیہ وسلم کا فرمان ہے:’لَیْسَ فِیمَا دُونَ خَمْسَۃِ أَوْسُقٍ صَدَقَۃٌ‘’’پانچ وسق سے کم میں صدقہ نہیں ہے۔‘‘ [3] اگر کھیت یا باغ کو چشمے یا دریا اور نہر کا پانی سیراب کرتا ہو تو اس میں دسواں حصہ زکاۃ ہے،یعنی پانچ وسق میں نصف وسق۔لیکن اگر پانی لگانے میں مشقت ہے یا خرچ آتا ہے،یعنی کنویں سے پلایا گیا ہے یا جانوروں کے ذریعے تو اس میں بیسواں حصہ ہے،یعنی پانچ وسق میں چوتھائی وسق۔اگر پیداوار کم و بیش ہے تو اسی حساب سے ادائیگی کی جائے،خواہ کم ہو یا زیادہ،اس لیے کہ رسول اللہ صلی اللہ علیہ وسلم کا فرمان ہے:’فِیمَا سَقَتِ السَّمَائُ وَالْعُیُونُ أَوْکَانَ عَثَرِیًّا الْعُشْرُ،وَمَا سُقِيَ بِالنَّضْحِ نِصْفُ الْعُشْرِ‘ ’’بارش اور چشمے سے سیراب شدہ اور عثری(ایسا پودا یا درخت جو جڑ کے ذریعے نیچے سے پانی حاصل کرے)میں دسواں حصہ ہے۔اور جسے کھینچ کر پانی دیا گیا ہو اس میں بیسواں حصہ ہے۔‘‘ [4] تنبیہات: 1: ایک شخص نے ایک مرتبہ آلات کے ذریعے سے پانی دیا اور دوسری مرتبہ اس کے بغیر(بارش یا دریا سے)تو اس میں دسواں حصہ کے تین ربع(تین چوتھائی)ہیں۔علماء یوں ہی کہتے ہیں اور علامہ ابن قدامہ رحمہ اللہ کا کہنا ہے کہ ہمیں اس میں کوئی اختلاف معلوم نہیں ہے۔ 2: کھجور کی تمام اقسام اکٹھی کر کے نصاب پورا ہو جائے تو اوسط قسم سے زکاۃ دے دی جائے۔نہ زیادہ عمدہ سے ادائیگی کی جائے اور نہ ہی ردی سے۔ 3: گندم،جو اور سلت(یہ جو کی ایک قسم ہے جس پر چھلکا نہیں ہوتا)کوزکاۃ میں ایک نصاب بنایا جائے۔ان کا مجموعہ نصاب زکاۃ تک پہنچ جائے تو جو زیادہ ہے اس میں سے زکاۃ نکالی جائے۔

[1] الموطأ للإمام مالک، الزکاۃ، باب ماجاء فیما یعتد بہ من السخل في الصدقۃ، حدیث: 611۔’’أکولہ‘‘ جو کھانے کے لیے پالی جارہی ہے،’’ الربی‘‘ جو دودھ کے لیے گھر میں پالی جارہی ہے، ’’ماخض‘‘ حاملہ بکری اور ’’فحل الغنم‘‘ بکریوں کے ریوڑ کا نر بکرا۔(الاثری) [2] الأنعام 141:6 [3] صحیح البخاري، الزکاۃ، باب ما أدي زکاتہ فلیس بکنز، حدیث: 1405، وصحیح مسلم، باب: لیس فیما دون خمسۃ أوسق صدقۃ، حدیث: 979۔ [4] صحیح البخاري، الزکاۃ، باب العشر فیما یسقٰی من ماء السماء :، حدیث: 1483 اور صحیح مسلم، الزکاۃ، باب مافیہ العشر أو نصف العشر، حدیث: 981 میں اس کا ایک شاہد ہے۔