منہاج السنہ النبویہ (جلد2،1)

’’تاکہ اﷲ تعالیٰ آپ کے سابقہ اور آمدہ گناہ معاف کر دے۔‘‘ شیعہ کہتے ہیں کہ: ’’ مَا تَقَدَّمَ ‘‘سے حضرت آدم علیہ السلام کا گناہ مراد ہے۔ اسی طرح وہ ’’مَا تَاَخَّرَ‘‘سے امت محمدی کے گناہ مراد لیتے ہیں ۔بلاشک و شبہ یہ بھی کلمات قرآن میں کھلی ہوئی تحریف ہے۔[اس کی وجوہات ]: پہلی وجہ :حضرت آدم علیہ السلام بھی ایک معزز نبی تھے۔اور آپ کی غلطی تو زمین پر اترنے سے قبل اﷲ تعالیٰ نے حضرت آدم علیہ السلام کی توبہ قبول کر لی تھی، اس وقت حضرت نوح و ابراہیم علیہ السلام ابھی پیدا بھی نہ ہوئے تھے۔پھر کیسے یہ کہہ سکتے ہیں کہ یہاں پر اس آیت کریمہ : ﴿اِِنَّا فَتَحْنَا لَکَ فَتْحًا مُّبِیْنًا﴾ (فتح 1) ’’ بیشک ہم نے آپ کو ایک کھلی فتح دی ہے ‘‘ سے مراد یہ ہے تاکہ آپ کی وجہ سے اللہ تعالیٰ حضرت آدم علیہ السلام کے گناہ معاف کردے۔[ گویا وہ جس بات سے بچنا چاہتے تھے، اسی کے مرتکب ہو گئے۔ نبی کریم صلی اللہ علیہ وسلم سے ایک لغزش کی نفی کی اور اسی لغزش کو حضرت آدم علیہ السلام سے چسپاں کر دیا، یہ کہاں کا انصاف ہے؟] دوسری وجہ : علاوہ ازیں اﷲ تعالیٰ فرماتے ہیں : ﴿ لَا تَزِرُ وَازِرَۃٌ وِّزْرَ اُخْرٰی﴾ (النجم:۳۸) ’’کوئی شخص دوسرے کا بوجھ نہیں اٹھائے گا۔‘‘ تو پھر ایک کے گناہ کا بوجھ دوسرے پر کیسے ڈالا جاسکتا ہے؟ تیسری وجہ :وہ مشہور حدیثِ شفاعت جسے کتب ستہ میں روایت کیا گیاہے؛ اس میں ہے: ’’چنانچہ لوگ ان کی خدمت میں حاضر ہوکر عرض کریں گے: اے بابا آدم! آپ انسانوں کے دادا ہیں ۔ اللہ تعالیٰ پاک نے آپ کو اپنے ہاتھ سے پیدا کیا تھا ، اپنی روح آپ کے اندر پھونکی تھی ، ملائکہ سے آپ کو سجدہ کروایا۔.... آپ اپنے رب کے حضور میں ہماری شفاعت کر دیں ۔....تو وہ اپنی غلطی کو یاد فرمائیں گے ....پھر سب لوگ نوح پھر حضرت ابراہیم علیہ السلام اور حضرت موسی و حضرت عیسی علیہما السلام کی خدمت میں حاضر ہوں گے؛ ....وہ کہیں گے: آپ محمد صلی اللہ علیہ وسلم کے پاس چلے جائیں ۔ وہ ایسی ہستی ہیں کہ اللہ تعالیٰ نے ان کی اگلی اور پچھلی لغزشیں معاف کردی ہیں ....۔‘‘ [1] تو آپ کی کمال عبودیت اوراللہ تعالیٰ کی جانب سے کمال مغفرت آپ کی شفاعت کی قبولیت کا سبب بنے گا۔‘‘ اگر یہ عنایت حضرت آدم علیہ السلام کے لیے ہوتی تو آپ اہل مؤقف کی شفاعت کرتے ۔ چوتھی وجہ :....جب مذکورۃ الصدرآیت[إِنا فتحنا لک فتحا مبِینا]نازل ہوئی، تو صحابہ کرام رضی اللہ عنہم نے عرض کیا یارسول اللہ صلی اللہ علیہ وسلم ! یہ آیت تو خصوصی طور پر آپ کے بارے میں نازل ہوئی ہے، ہمارے متعلق

[1] البخاری 6؍84 ؛ کتاب التفسِیرِ، سورۃ بنِی ِإسرائِیل: باب ذرِیۃِ من حملنا مع نوح؛ مسلِم 1؍180 کتاب الِإیمانِ، باب أدنی أہلِ الجنۃِ منزِلۃ۔