مفتاح النجاۃ

کتاب: مفتاح النجاۃ مصنف: غلام مصطفٰی ظہیر امن پوری پبلیشر: مکتبہ دار السلف ترجمہ: عرض مؤلف قرآن کریم کی بعض آیات اور سورتیں بعض دوسری آیات و سورتوں پر مقام و مرتبہ میں فضیلت رکھتی ہیں ۔ متکلم کے اعتبار سے تو سارا قرآن برابر ہے، کیونکہ سب آیات اور سورتیں ایک ہی متکلم (اللہ تعالیٰ) کا کلام ہیں ، مگر اپنے مدلولات اور موضوعات کے اعتبار سے فرق ہے، مثلاسورت اخلاص اللہ تعالیٰ کے اسما وصفات پر مشتمل ہے،یہ سورت لہب کی طرح نہیں ہو سکتی، کیوں کہ وہاں ابو لہب کا حال و انجام بیان ہوا ہے۔ اسی طرح انداز بیان کی قوت و تاثیر کے اعتبار سے بھی آیات وسور میں تفاوت ہے۔ بعض آیات چھوٹی ہوتی ہیں ، لیکن ان میں ترغیب و ترہیب کا گراں قدر سامان موجود ہوتا ہے۔ بعض آیات طویل ہوتی ہیں ، لیکن ان میں وہ قوت وتاثیر نہیں ہوتی، سورت بقرہ کی آیت دَین (نمبر : ۲۸۲)کی مثال لیجئے ۔ اس آیت میں لوگوں کے باہمی معاملات ڈسکس کئے گئے ہیں اور یقینا ان میں وہ تاثیر نہیں ہوگی جو سورت آل عمران کی آیت نمبر ۱۸۵ میں ہے۔کیوں کہ اس آیت مبارکہ میں انسانوں کووعظ و نصیحت کی گئی ہے اور ترغیب و ترہیب سے کام لیا گیا ہے،یہ چیز آیت دَین میں نہیں ہے، حالاں کہ آیت دَین اس سے لمبی ہے۔