مسنون نماز اور روز مرہ کی دعائیں

دعائیہ کلمات میں مذکر کے صیغے عورتیں بھی استعمال کر سکتی ہیں ۔ واللّٰہ أعلم[1] اس فتوی سے یہ واضح ہوا کہ عورت کے لیے دعائیہ کلمات میں مذکر کے صیغوں کو مؤنث کے صیغوں میں تبدیل کرنا ضروری نہیں ہے بلکہ وہ مردوں ہی کی طرح مذکر کے صیغوں میں بھی دعا کر سکتی ہیں ۔ عورتوں کا طریقۂ نماز اور فقہائے کرام کا موقف یہ مسئلہ تقریباً پورے عالم اسلام میں زیر بحث چلا آرہا ہے کہ عورت نماز کس طرح پڑھے؟ اس کا طریقۂ نماز وہی ہے جو مردوں کا ہے یا اس سے مختلف ہے؟ بعض حضرات جن کے مذہب کی بنیاد ضعیف یا موضوع (من گھڑت) روایات ہیں یا وہ رائے اور قیاس کو احادیث کے مقابلے میں زیادہ اہمیت دیتے ہیں ، وہ مرد اور عورت کے طریقۂ نماز میں بہت سی باتوں میں فرق کرتے ہیں ، مثلاً وہ کہتے ہیں : ٭ مرد تکبیر تحریمہ کے رفع الیدین میں کانوں تک ہاتھ اٹھائے اور عورت کندھوں یا چھاتیوں تک۔ ٭ مرد ناف کے نیچے ہاتھ باندھے اور عورت سینے پر، اس طرح کہ داہنے ہاتھ کی ہتھیلی بائیں ہاتھ کی پُشت پر آجائے۔ ٭ مرد سجدے میں اپنے بازو زمین پر بھی نہ رکھے اور اپنے پہلوؤں کے ساتھ بھی نہ ملائے۔ لیکن عورت سمٹ کر اور زمین سے اس طرح چمٹ کر سجدہ کرے کہ پیٹ رانوں سے بالکل مل جائے۔ نیز پاؤں کو کھڑا کرنے کی بجائے انہیں دائیں طرف نکال کر بچھا دے، خواتین کہنیوں سمیت پوری باہیں بھی زمین پر رکھیں ۔

[1] مجموع فتاویٰ شیخ الاسلام امام ابن تیمیہ: 488:22، طبع قدیم ۔