مسنون نماز اور روز مرہ کی دعائیں

نماز کا طریقہ اور نمازِ پنجگانہ کی تفصیل نماز کی نیت ہر کام کرتے وقت اِنسان کے دل میں اس کی نیت اور ارادہ ہوتا ہے، وہ زبان سے اس کا اظہار کرتا ہے نہ اس کی ضرورت ہی سمجھتا ہے۔ اِسی طرح نماز کی بھی نیت نمازی کے دل میں ہوتی ہے، زبان سے مخصوص الفاظ ادا کرنے درست نہیں ۔ یہی وجہ ہے کہ نبی صلی اللہ علیہ وسلم سے نماز کی نیت کے الفاظ منقول نہیں ، اس لیے اُردو وغیرہ میں نیت کے جو الفاظ ادا کیے جاتے ہیں ، وہ خودساختہ ہیں ، انہیں ہرگز زبان سے ادا نہ کیا جائے، اس طرح نماز ہی ضائع ہونے کا خطرہ ہے کیونکہ زبان سے نیت کے الفاظ ادا کرنا بدعت، یعنی دین میں اپنی طرف سے اضافہ ہے، تو اگر نماز کا آغاز ہی بدعت سے ہوگا جس کو رسول اللہ صلی اللہ علیہ وسلم نے ’’بدترین کام‘‘ قرار دیا ہے تو وہ نماز کس طرح عند اللہ مقبول ہوگی؟ تکبیر تحریمہ پہلی تکبیر کو تکبیر تحریمہ کہتے ہیں جس کا مفہوم ہے، حرام کر دینے والی تکبیر، یعنی اب نماز میں گفتگو کرنا، دُنیاوی اُمور میں مشغول ہونا اور نماز کے آداب و شرائط کے خلاف کام کرنا حرام ہے۔