مسئلہ تکفیر اور اس کے اصول و ضوابط

ان احادیث صحیحہ میں نبی کریم صلی اللہ علیہ وسلم نے کئی معاصی اور نافرمانیوں پر کفر کا اطلاق کیا ہے، اس لیے کہ یہ کفر کے شعبے ہیں جبکہ اس کے مقابلے میں کئی طاعات پر ایمان کا اطلاق کیا ہے۔ جیسے عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ((الحیاء من الإیمان۔))[1] ’’حیاء ایمان میں سے ہے۔‘‘ ابو امامہ رضی اللہ عنہ سے مروی ہے: ((إن البذاذۃ من الإیمان۔))[2] ’’یقینا سادگی ایمان میں سے ہے۔‘‘ اور ایمان کے شعبوں کے متعلق یہ حدیث مشہور و معروف ہے: ((الإیمان بضع و سبعون أفضلہا قول لا إلٰہ إلا اللّٰہ و أدناہا إماطۃ العظم عن الطریق و الحیاء شعبۃ من الإیمان۔))[3] ’’ایمان کے ستر سے زائد … اور ایک روایت میں ساٹھ سے زیادہ …شعبے ہیں ان میں سب سے زیادہ افضل لا الہ الا اللہ کہنا اور سب سے کمتر راستے سے ہڈی کو ہٹانا اور حیاء ایمان کا ایک شعبہ ہے۔‘‘ یہ حدیث اس بات کی واضح دلیل ہے کہ ایمان کے بے شمار شعبے ہیں اور ان کے بالمقابل کفر کے بھی بے شمار شعبے اور شاخیں ہیں اور یہ سب ایک درجے پر نہیں ہیں۔ لہٰذا کسی شخص پر حکم لگانے سے قبل اچھی طرح دیکھ لینا چاہیے کہ وہ کفر کس درجے کا ہے، اسلام سے خارج کرنے والا کفر ہے یا نہیں۔ تمام شرائط و ضوابط اور موانع پرکھنے کے بعد مفتی کسی کے خارج از اسلام ہونے کا فیصلہ کرتا ہے۔

[1] ) صحیح البخاري: 24۔ صحیح مسلم: 36۔ [2] ) سنن ابي داود: 4161۔ سنن إبن ماجہ: 4118۔ مسند احمد: 24009/58۔ المستدرک: 1/9۔ شعب الإیمان للبیہقي: 8136۔ مسند الشہاب للقضاعي: 157۔ کتاب الآداب للبیہقي: 240۔ الکنی لأبي احمد الحاکم:2/13۔ تہذیب الکمال للمزي: 33/51۔ في ترجمۃ أبي امامۃ۔ [3] ) صحیح البخاري: 9۔ صحیح مسلم: 35/58۔ ترمذي: 2801۔ سنن أبي داود: 4676۔ مسند أحمد: 8926، 9361۔ إبن ماجہ: 57۔ صحیح إبن حبان: 166