مسئلہ رؤیتِ ہلال اور 12 اسلامی مہینے

جمادی الأُولی اور جمادی الثانیہ اسلامی سال کا پانچواں اور چھٹا مہینہ جمادی الاولیٰ اور جمادی الاخریٰ ہیں۔ وجۂ تسمیہ جُمَادیٰ، بروزنِ مُنَادیٰ، جمود سے ہے جس کے معنی جمنے کے ہیں۔ جس زمانے میں، ان مہینوں کے یہ نام پڑے، اس زمانے میں ان مہینوں میں سردی کی شدت کی وجہ سے پانی جم جاتا تھا، اس لیے ان دونوں مہینوں کا نام جُمادیٰ قرارپاگیا اورانھیں اَلْأُولٰی اور اَلْأُخْرٰی یا اَلثَّانِیَۃ کے ساتھ ایک دوسرے سے ممتاز کردیا گیا۔ جُمادیٰ، مؤنث ہے، اس لیے دونوں کی صفت اَلْأُوْلٰی اور اَلْأُخْرٰی یا اَلثَّانِیَۃ ہوگی۔ اَلْأُخْرٰی اور اَلثَّانِیَۃ، دونوں کے معنی ہیں: دوسرا، اس لیے جمادی الاخریٰ یا جمادی الثانیہ، دونوں طرح صحیح ہے، اس لیے کہ دونوں ہم معنی ہیں۔ انھیں اہل اردو جمادی الاول اور جمادی الثانی لکھتے اور بولتے ہیں جو غلط ہے کیونکہ یہ عربی قواعد کے خلاف ہے، یہ موصوف صفت ہیں، ان میں مطابقت ضروری ہے۔ بنا بریں اس غلطی کی تصحیح ضروری ہے۔ اور وہ تصحیح یہی ہے کہ انھیں جُمادَی الْأُوْلٰی اور جُمادَی الْأُخْریٰ یا جُمادَی الثانیۃ لکھا اور بولا جائے۔