مسئلہ رؤیتِ ہلال اور 12 اسلامی مہینے

جس نے عاشورا کا روزہ رکھا تو گویا اس نے پورا زمانہ (عمر بھر) روزہ رکھا اور یہ نبیوں کا روزہ ہے۔ جس نے دسویں محرم کی رات کو شب بیداری کی تو گویااُس نے ساتوں آسمانی مخلوق کے مماثل عبادت کی۔ جس نے عاشورا کے دن چار رکعات اس طرح پڑھیں کہ ہررکعت میں سورۃ الحمد ایک مرتبہ اور سورۂ اخلاص پچاس مرتبہ تلاوت کی تو اللہ نے اس کے ماضی و مستقبل کے پچاس پچاس سالہ گناہ معاف کر دیے۔ اورملأِ اعلیٰ (بلند ترین مقام اقتدار) میں اس کے لیے ایک لاکھ نوری منبر بنا دیے۔ عاشورا کے دن جس نے ایک گھونٹ شربت پلایا تو گویا اس نے ایک لمحہ کے لیے بھی اللہ کی نافرمانی نہیں کی۔ عاشورا کے دن جس نے اہل بیت کے مسکینوں کو پیٹ بھر کھلایا تو وہ پل صراط پر سے بجلی کی چمک کی طرح گزر جائے گا۔ عاشورا کے دن جس نے کچھ بھی خیرات کی تو گویا سال بھر اس نے کسی سائل کو اپنے در سے واپس نہیں کیا۔ عاشورا کے دن جس نے غسل کیا تو وہ مرض موت کے سوائے کبھی بیمار نہیں ہو گا۔ عاشورا کے دن جس نے سرمہ لگایا تو پورا سال اس کی آنکھیں نہیں آئیں گی۔ عاشورا کے دن جس نے کسی یتیم کے سر پر ہاتھ پھیرا تو گویا اس نے دنیا جہاں کے تمام یتیموں کے ساتھ بھلائی کی۔ عاشورا کے دن جس نے کسی کی عیادت کی تو گویا اس نے تمام اولاد آدم علیہ السلام کے مریضوں کی عیادت کی۔