کتاب: مقالات حدیث - صفحہ 262
فرمایا: ’’ويسمي الرجل طائفة‘‘[1]ادنیٰ اطلاق کے لحاظ سے ’’طائفه‘‘ ایک آدمی پر بھی بولا جاتا ہے اور عام مفہوم کے لحاظ سے ’’طائفه‘‘ کا لفظ تواتر سے کم پر بھی بولا جائے گا۔
ایسے لوگ علم دیانت یا اصول و فروع کے متعلق جو بھی فرما دیں گے، وہ خبر واحد ہو گا، جسے قرآن نے قابل قبول فرمایا ہے۔
﴿ إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ ﴾ (الحجرات: 6)
میں دوسرے پہلو کی وضاحت فرمائی کہ فاسق کی خبر میں تبین کی ضرورت ہے۔ اگر قرائن مل جائیں، تو اس کی بھی تصدیق کی جائے گی۔ جس کا مفاد یہ ہے کہ خبر واحد کی ظنیت بمعنی عدم احتجاج اس وقت تک ہے جب مخبر فاسق اور تبین نہ کیا گیا ہو۔ مومن ثقہ اور صادق کی خبر میں کوئی اشتباہ اور ظن کی گنجائش نہیں۔ اس کے لیے مسلسل ایسی احادیث بیان فرمائی ہیں، جن میں خبر واحد پر اعتماد کیا گیا ہے۔ یہ معلوم ہو جانے کے بعد کہ مخبر ثقہ ہے، صادق ہے، اس کی بات بلا تبین قبول کی گئی۔
(1) تحویلِ قبلہ کے وقت ایک آدمی کی اطلاع پر پوری جماعت رو بقبلہ ہو گئی۔ [2]
(2) آنحضرت صلی اللہ علیہ وسلم کے خطوط اور فرامین مختلف ممالک کی طرف خبر واحد کے طور پر ہی بھیجے گئے۔ [3]
(3) حضرت معاذ رضی اللہ عنہ کو یمن بھیجا۔ [4]
(4) حضرت زبیر رضی اللہ عنہ کو بطور جاسوس بھیجا۔ [5]
[1] صحيح البخاري: كتاب أخبار الآحاد، باب ما جاء في إجازة خبر الواحد الصدوق في الأذان والصلاة والصوم والفرائض والأحكام و قول اللّٰه تعاليٰ: ﴿ فَلَوْلَا نَفَرَ مِن كُلِّ فِرْقَةٍ مِّنْهُمْ طَائِفَةٌ لِّيَتَفَقَّهُوا فِي الدِّينِ وَلِيُنذِرُوا قَوْمَهُمْ إِذَا رَجَعُوا إِلَيْهِمْ لَعَلَّهُمْ يَحْذَرُونَ ﴾ و يسميٰ الرجل طائفة، لقوله تعاليٰ: ﴿ وَإِن طَائِفَتَانِ مِنَ الْمُؤْمِنِينَ اقْتَتَلُوا ﴾ فلو اقتتل رجلان دخلا في معني الآية، وقوله تعاليٰ: ﴿ إِن جَاءَكُمْ فَاسِقٌ بِنَبَإٍ فَتَبَيَّنُوا ﴾ وكيف بعث النبي صلي اللّٰه عليه وسلم أمراءه و احداً بعد واحد، فأن سها منهم رد إلي السنة، (13/233، مع الفتح)
[2] صحيح البخاري، رقم الحديث (6824، 6825)
[3] صحيح البخاري، رقم الحديث (6836)
[4] صحيح البخاري، كتاب التوحيد، باب ما جاء في دعاء النبي صلي اللّٰه عليه وسلم أمته إلي توحيد اللّٰه تبارك و تعاليٰ، رقم الحديث (6937)
[5] صحيح البخاري، كتاب أخبار الآحاد، باب بعث النبي صلي اللّٰه عليه وسلم الزبير طليعة واحدة، رقم الحديث (6833)