مجموعہ رسائل عقیدہ(جلد3)

آٹھویں فصل عقائدِ نسفی کا بیان اہلِ حق نے کہا ہے کہ اشیا کے حقائق ثابت ہیں اور سو فسطائیہ کے خلاف ان حقائق کے ساتھ علم متحقق ہے۔ مخلوق کے لیے علم کے اسباب تین ہیں: 1۔حواسِ سلیمہ 2۔خبرِ صادق 3۔عقل۔ جہاں تک حواس کا تعلق ہے تو وہ پانچ ہیں: 1۔سننا، 2۔دیکھنا، 3۔سونگھنا، 4۔چکھنا، 5۔چھونا۔ خبرِ صادق دو طرح کی ہوتی ہے: 1۔خبرِ متواتر جو ایسی قوم کی زبانوں سے ثابت ہوئی ہو جن کا جھوٹ پر اتفاق کرنا غیر متصور ہے، اس خبر سے علم ضروری حاصل ہوتا ہے جیسے گذشتہ زمانوں میں گذشتہ بادشاہوں کا علم اور دور کے شہروں کا علم۔ 2۔معجزے کے ساتھ موید رسول کی خبر۔ اس خبر سے علمِ استدلال حاصل ہوتا ہے، جو علم اس خبر سے ثابت ہوتا ہے وہ اسی علم کی مانند ہے جو بالضرورت ثابت ہے۔ یقین وثبات کے حصول میں مطابقِ جازم اعتقاد کے معنی میں یہی علم ثابت ہے اور اگر یہ بات نہ ہو تو پھر وہ خبر ظن یا جہل یا تقلید ٹھہرے گی۔ عقل بھی علم کا ایک سبب ہے اور جو بات بالبداہت عقل سے ثابت ہوتی ہے وہ ضروری ہے، جیسے یہ علم کہ شے کا کل اس کے جز سے بڑا ہوتا ہے۔ جو علم استدلال سے ثابت ہوتا ہے وہ اکتسابی ہے۔ رہا الہام تو اہلِ حق کے نزدیک وہ کسی چیز کی صحت کی معرفت کے اسباب میں سے نہیں ہے۔ 1۔عالم اپنے تمام اجزا کے ساتھ محدث ہے، کیونکہ یہ عین اور عرض ہے۔ عین وہ ہے جو بذات خود قائم ہو، پھر اگر مرکب ہے تو جسم ہے اور اگر غیر مرکب ہے تو جوہر ہے۔ اسی کو ’’جز لا یتجزی‘‘ [وہ جزو جس کی تقسیم نہیں ہوتی] کہتے ہیں۔ عرض وہ ہے جو خود قائم نہ ہو بلکہ جسم و جوہر میں پیدا ہو، جیسے طرح طرح کے رنگ اور الوان اور ہر طرح کے اکوان جیسے حرکت، سکون، اجتماع، افتراق