مجموعہ رسائل عقیدہ(جلد2)

اللہ نے شرک کو ظلم عظیم کہا ہے۔ وہ ظلم جسے بخش دیتا ہے ، بندوں کا ان امور میں اپنی جانوں پر ظلم کرنا ہے جو ان کے اور اللہ کے درمیان ہیں۔ رہا وہ ظلم جس کو اللہ نہیں چھوڑتا تو وہ ظلم ہے، جو بندے ایک دوسرے پر کرتے ہیں، یہاں تک کہ بعض کے لیے بعض سے بدلہ لے گا۔‘‘ (رواہ البزار) [1] 3۔تیسری حدیث معاویہ رضی اللہ عنہ کی ہے کہ رسول اللہ صلی اللہ علیہ وسلم نے فرمایا: ’’قریب ہے کہ اللہ ہر گناہ کو بخش دے، مگر اس آدمی کا گناہ جو کافر فوت ہوا یا کسی مومن کو قصداً قتل کیا۔‘‘ (رواہ أحمد و النسائي) [2] 4۔چوتھی حدیث ابو ذر رضی اللہ عنہ کی ہے۔ رسول اللہ صلی اللہ علیہ وسلم نے فرمایا: ’’اللہ تعالیٰ فرماتا ہے: اے میرے بندے! اگر تو مجھ سے زمین بھر خطائیں لے کر ملے گا، پھر مجھ سے ملے گا کہ میرے ساتھ کوئی چیز شریک نہیں کرتا تھا تو میں تجھ سے زمین بھر مغفرت لے کر ملوں گا۔‘‘ (تفرد بہ أحمد من ھذا الوجہ) [3] 5۔پانچویں حدیث سیدنا ابو ذر رضی اللہ عنہ کی ہے کہ رسول اللہ صلی اللہ علیہ وسلم نے فرمایا: ’’جس بندے نے ’’لا الٰہ الا اللہ‘‘ کہا، پھر اسی پر فوت ہوا تو وہ جنت میں جائے گا۔ ابوذر نے کہا: اگرچہ اس نے زنا یا چوری کی ہو؟ آپ صلی اللہ علیہ وسلم نے فرمایا: اگرچہ اس نے زنا یا چوری کی ہو۔ یہ بات تین مرتبہ فرمائی۔ چوتھی بار آپ صلی اللہ علیہ وسلم نے فرمایا : (( عَلٰی رَغْمِ أَنْفِ أَبِيْ ذَرٍّ ))اگرچہ ابو ذر کی ناک خاک آلود ہو۔‘‘ (رواہ الشیخان وأحمد بطولہ) [4] اس حدیث کے دوسرے الفاظ یہ ہیں: (( ذَاکَ جِبْرِیْلُ اَتَانِيْ، فَقَالَ: مَنْ مَّاتَ مِنْ أُمَّتِکَ لَا یُشْرِکُ بِاللّٰہِ شَیْئًا دَخَلَ الْجَنَّۃَ، قُلْتُ: وَإِنْ زَنٰی وَإِنْ سَرَقَ؟ ))(رواہ أحمد والشیخان) [5]

[1] مسند البزار (۱۳/ ۱۱۵) السلسلۃ الصحیحۃ (۴/ ۵۶۰) [2] مسند أحمد (۴/۹۹) سنن النسائي (۳۹۸۴) [3] صحیح مسلم (۲۶۸۷) مسند أحمد (۵/۱۵۴) [4] صحیح البخاري (۵۸۲۷) صحیح مسلم (۹۴) مسند أحمد (۵/۱۶۶) [5] صحیح البخاري (۲۳۸۸) صحیح مسلم (۹۴) مسند أحمد (۵/۱۵۲)