مجموعہ علوم القرآن

باب الھاء الہادي إلی معرفۃ المقاطع والمبادي: یہ شیخ ابو العلاء الحسن بن احمد بن الحسن بن العطار الہمدانی رحمہ اللہ (المتوفی: ۵۶۹؁ھ) کی تالیف ہے۔یہ وقوفِ قرآن سے متعلق ہے۔ ہدایۃ الرفاق في القراء ۃ: یہ احمد بن محمد ابو المکارم المقری الواسطی رحمہ اللہ کی تالیف ہے۔ ہدایۃ الراوي إلی الفاروق المداوي للعجز عن تفسیر البیضاوي: یہ صادق الکیلانی رحمہ اللہ کی تالیف ہے۔ الہدایۃ في القراء ۃ: یہ ابو العباس احمد بن عمار المہدوی رحمہ اللہ (المتوفی: ۴۳۰؁ھ) کی تالیف ہے۔ ہدایۃ المرقات وغایۃ الحفاظ والطلاب: یہ شیخ الامام علاء الدین علی السخاوی رحمہ اللہ (المتوفی: ۶۴۳؁ھ) کی قراء ت پر مختصر منظوم تالیف ہے،اس کا آغاز یوں ہوتا ہے:’’الحمد للّٰہ الأحد الصمد،منزل الذکر علی محمد…الخ‘‘ ہدایۃ الأحباب في تفسیر أعظم آیات الکتاب: یہ عبداللہ الدنوشری رحمہ اللہ کی تالیف ہے۔یہ آیۃ الکرسی کی تفسیر ہے،اس کی ابتدا یوں ہوتی ہے:’’الحمد للّٰہ الذي شرف الوجود بمن أنزل علیہ أشرف الخطاب…الخ‘‘ ہلالین في شرح تفسیر الجلالین: یہ صرف قرآن کریم کے آخری پارے پر ابو البرکات رکن الدین معروف مولوی تراب علی لکھنوی مرحوم رحمہ اللہ (المتوفی: ۱۲۸۰؁ھ) کی تالیف ہے۔یہ کانپور کے مطبع نظامی سے طبع ہو چکی ہے۔راقم الحروف نے مولف مغفور کو فرخ آباد میں دیکھا اور ان کے ہاتھ کا لکھا ہوا تفسیر مذکور کا مسودہ دیکھا۔بعض افراد سے معلوم ہوا کہ مکمل سورۃ البقرۃ پر اور سورت ق سے لے کر آخر قرآن تک مذکورہ شرح لکھی گئی۔حقیقت یہ ہے کہ’’جمل‘‘ کے بعد جلالین پر کوئی تحریر یا شرح یا حاشیہ لکھنا ایک فضول کام ہے۔