مجموعہ علوم القرآن

ہے:’’الحمد للّٰہ العلي العظیم الجواد الکریم…الخ‘‘ یہ کتاب پانچ جلدوں پر مشتمل ہے۔ مجمع الأمثال: مولف نے اس کا یہی نام رکھا ہے۔اس میں چھے ہزار اور کچھ مثالیں بیان کی گئی ہیں،یہ ابو لفضل احمد بن محمد النیشاپوری المعروف بہ المیدانی رحمہ اللہ (المتوفی: ۵۱۸؁ھ) کی تالیف ہے۔مولف نے اس میں کہا ہے کہ قرآن مجید میں مثالیں بہت زیادہ ہیں۔حدیثِ نبوی میں امثلہ پر عسکری رحمہ اللہ نے ایک کتاب تالیف کی ہے۔بیان کیا جاتا ہے کہ جب زمخشری رحمہ اللہ نے اپنی کتاب’’المستقصی في الأمثال‘‘ تالیف کی تو اس کی نظر سے میدانی رحمہ اللہ کی یہ تالیف:’’مجمع الأمثال‘‘ گزری۔وہ اپنی تالیف’’المستقصی‘‘ پر بہت نادم ہوا،کیونکہ اس کی کتاب حسنِ تالیف،بسطِ عبارت اور کثرتِ فوائد میں’’مجمع الأمثال‘‘ سے کہیں کم تر تھی۔’’کشف الظنون‘‘ میں اس کتاب کے تعارف اور بیانِ احوال میں بہت لمبا کلام کیا گیا ہے۔بہ ہرحال اس کتاب میں ہر قسم کی امثال موجود نہیں،مگر اس جگہ صرف امثالِ قرآن کی طرف اشارہ کرنا مقصود ہے۔ مجمع البحار في غرائب التنزیل ولطائف الأخبار: یہ شیخ محمد طاہر الصدیقی الفتنی رحمہ اللہ (المتوفی: ۹۸۶؁ھ) کی تالیف ہے۔’’کشف الظنون‘‘ میں مولف کی وفات ۹۸۱؁ھ میں بیان کی گئی ہے،جب کہ پہلی تاریخِ وفات درست ہے۔مولف نے اس میں کتاب و سنت ہر دو کے غرائب کو حروف تہجی کی ترتیب پر بیان کیا ہے۔مولف نے اس کتاب پر ایک ذیل اور تکملہ لکھا ہے۔مولف نے اس کتاب میں’’نہایۃ ابن أثیر‘‘ کا انداز اختیار کیا ہے۔یہ کتاب دو ضخیم جلدوں میں ہے،جو ہندوستان میں طبع ہو چکی ہے۔مولف کاتعلق’’بوہرہ‘‘ قوم سے ہے،جو گجرات،دکن اور مالوہ میں آباد ہے۔مولف سنی المذہب تھے۔میں نے مولف اور ان کی کتاب کے حالات اپنی کتاب’’إتحاف النبلاء المتقین بإحیاء مآثر الفقہاء المحدثین‘‘ میں پوری تفصیل کے ساتھ بیان کیے ہیں۔کانپور کے مطبع نظامی نے اس کتاب (إتحاف النبلاء) کو زیور طبع سے آراستہ کیا،جو آفاق عالم میں پھیل گئی اور اہلِ علم کے ہاں بہت مقبول ہوئی۔