مجموعہ علوم القرآن

تفسیر سور ابادي،ابو بکر عتیق بن محمد۔یہ فارسی زبان میں ہے،اس کا آغاز یوں ہوتا ہے:’’الحمد للّٰہ الذي باسمہ تصحیح الأمور…الخ‘‘ تفسیر سورۃ الإخلاص،یہ فخرالدین رازی رحمہ اللہ کی مختصر تفسیر ہے،اس کے ابتدائی الفاظ یہ ہیں :’’الحمد للّٰہ حق حمدہ …الخ‘‘ موصوف نے اس میں ذکر کیا ہے کہ بعض وہ اسرار جو اس سورت میں ودیعت کیے گئے ہیں،میں ان سے آگاہ ہوا اور اکثر مفسرین مقصد قویم کو پانے سے محروم ہی رہے ہیں۔عقل مند آدمی جب ان مباحث کے معاقد میں غور کرتا ہے تو اس کے سامنے یہ بات ظاہر ہوتی ہے کہ معاملہ اس سے بالا تر ہے جو وہ گمان کرتے ہیں۔مولف نے اسے چار فصلوں میں مرتب کیا ہے۔ تفسیر سورۃ الإخلاص،یہ علی بن محسن حسنی سمنانی رحمہ اللہ کی تفسیر ہے،اس کا آغاز یوں ہوتا ہے:’’الحمد للّٰہ الذي فتح بمفاتیح الفاتحۃ والإخلاص…الخ‘‘ شیخ زادہ محشی نے بھی اس پرایک تفسیر لکھی ہے،جس کا نام انھوں نے’’الإخلاصیۃ‘‘ رکھا ہے،اس کا آغاز ان الفاظ سے ہوتا ہے:’’الحمد للّٰہ الأحد الصمد…الخ‘‘ نیز ابن الدہان سعید بن مبارک نحوی رحمہ اللہ (المتوفی: ۵۶۹؁ھ) نے بھی اس پر ایک تفسیر لکھی ہے۔شیخ رئیس علی بن سینا اور جلال دوانی رحمہما اللہ نے بھی اس سورت کی تفسیر لکھی ہے۔ تفسیر سورۃ الإنسان،یہ علامہ غیاث الدین مقصود بن صدرالدین محمد شیرازی رحمہ اللہ (المتوفی: ۹۴۹؁ھ) کی تالیف ہے۔یہ ایک مختصر تفسیر ہے جو تحقیقاتِ لطیفہ اور مباحثِ شریفہ پر مشتمل ہے،اس کا آغاز یوں ہوتا ہے:’’أحمد اللّٰہ علیٰ جمیل سلطانہ…الخ‘‘ تفسیر سورۃ الأعراف،باحواشی،یہ شیخ غلام نقشبندی لکھنوی رحمہ اللہ (المتوفی: ۱۱۲۶؁ھ) کی تالیف ہے۔انھوں نے سورت مریم،طٰہٰ،محمد،یوسف،رحمن،عم،کوثر،اخلاص پر اور آیت نور،آیت امانت،آیت ﴿اَفَحَسِبْتُمْ﴾ آیت ﴿وَ لَا تَقُوْلَنَّ لِشَایْئٍ اِنِّیْ فَاعِلٌ ذٰلِکَ غَدًا﴾ آیت استوا اور آیت ﴿کُلُوْا وَاشْرَبُوْا﴾ پر مع حواشی الگ سے تفاسیر لکھی ہیں۔موصوف دانش مندی اور ولایت کے جامع تھے،ان کا شمار ہندوستان کے علما و اولیا میں ہوتا ہے۔