مجموعہ علوم القرآن

سانس کا ایسے مدہ پر پورا ہونا جو مدہ ایک حرف پر معتمد ہو،اس سے ایک متسع فاقیہ بنتا ہے،جس کا طبع ذوق کرتی ہے اور چند بار اس کا اعادہ کرنے سے لذت حاصل کرتی ہے۔اگرچہ وہ مدہ ایک جگہ الف ہو،ایک جگہ واؤ یا یا ہو اور وہ آخری حرف اگرچہ ایک جگہ یا ہو اور ایک جگہ جیم یا قاف ہو۔اسی طرح کلام کے آخر پر الف کے ملنے سے ایک متسع قافیہ بنتا ہے،جس کے اعادے سے لذت محسوس ہوتی ہے گو حرف کی صورت مختلف ہو،جیسے’’حدیثا‘‘ اور’’بصیرا‘‘ ہے۔ اس صورت میں اگر التزام موافقت روی کام آتا ہے تو وہ التزام بلا ملتزم کی قبیل سے ہو گا،جیسے سورت مریم اور سورۃ الفرقان کے شروع میں واقع ہوا ہے،اسی طرح آیات کا ایک حرف پر توافق،جیسے سورت قتال (محمد) سورت ن (والقلم) اور سورۃ الرحمن میں ہے،لذت دیتا ہے۔اسی طرح ایک جملے کے بعد دوسرے جملے کا اعادہ ایک گونا لذت عطا کرنے والا ہے،جیسے سورۃ الشعراء،سورۃ القمر،سورۃ الرحمن اور سورۃ المرسلات میں ہے۔ کبھی ایسا بھی ہوتا ہے کہ سامع کے ذہن کو خوش کرنے کے لیے اور اس کلام کی لطافت سے آگاہ کرنے کے لیے سورت کے آخری فواصل کو شروع کے فاصلوں سے مختلف کر دیا جاتا ہے،جیسے سورت مریم کے آخر پر ﴿اِدًّا﴾ اور ﴿ھَدًّا﴾ ہے،﴿کِرَامًا﴾ اور ﴿سَلٰمًا﴾ سورۃ الفرقان کے آخر پر اور ﴿طِیْنٍ﴾،﴿سٰجِدِیْنَ﴾ اور ﴿یَنْظُرُوْنَ﴾ سورت صاد کے آخر پر ہے،جبکہ صورتِ حال یہ ہے کہ ان سورتوں کے شروع میں فواصل آخر سے مختلف ہیں۔پس اکثر سورتوں میں اسی وزن اور قافیے کو،جس کی تعبیر و بیان گزر چکا ہے،معتبر سمجھا گیا ہے۔ اگر آیت کے آخر پر کوئی ایسا حرف ہو،جو قافیہ بننے کی صلاحیت رکھتا ہو تو وہ قافیہ بن جائے گا،ورنہ اسے ایسے جملے کے ساتھ ملا دیا جاتا ہے،جس میں اللہ کی نعمتوں کا ذکر یا مخاطب کے لیے کوئی تنبیہ ہوتی ہے،ایسی بعض جگہوں میں اِطناب (مخصوص فائدے کے لیے مطلب سے زیادہ الفاظ لانا) کو کام میں لایا جاتا ہے،کبھی تقدیم و تاخیر کو استعمال کیا جاتا ہے اور کبھی قلب و زیادت کا سہارا لیا جاتا ہے،جیسے’’الیاس‘‘ اور’’طور‘‘ کو ﴿اِِلْ یَاسِیْن﴾ اور ﴿طُوْرِ سِیْنِیْن﴾ میں۔ بعض سورتوں میں قافیے اور وزن کی اس قسم کو استعمال میں نہیں لایا جاتا،بلکہ خطبا کے خطبوں کی طرز اور نکتہ دان لوگوں کے طریقے پر ان کو بیان کیا جاتا ہے۔بعض سورتوں میں عرب نامور لوگوں