مجموعہ علوم القرآن

تیسری آیت: ﴿فَادْعُ وَاسْتَقِمْ کَمَآ اُمِرْتَ وَلاَ تَتَّبِعْ اَھْوَآئَ ھُم﴾ [الشوریٰ: ۱۵] [تو دعوت دے اور مضبوطی سے قائم رہ،جیسے تجھے حکم دیا گیا ہے اور ان کی خواہشوں کی پیروی مت کر] یہ اﷲ تعالیٰ کے اس ارشاد: ﴿قَاتِلُوا الَّذِیْنَ لَا یُؤْمِنُوْنَ بِاللّٰہِ وَ لَا بِالْیَوْمِ الْاٰخِرِ﴾ [التوبۃ: ۲۹] [لڑو ان لوگوں سے جو نہ اللہ پر ایمان رکھتے ہیں اور نہ یوم آخر پر] سے منسوخ ہے۔لیکن آنحضرت صلی اللہ علیہ وسلم کے لوگوں کو دعوتِ اسلام دینے پر استقامت میں کوئی ایسی چیز نہیں جو نسخ پر دلالت کرے،پس یہ آیت جمہور کے نزدیک محکم ہے۔ چوتھی آیت: ﴿لَنَآ اَعْمَالُنَا وَلَکُمْ اَعْمَالُکُمْ لاَ حُجَّۃَ بَیْنَنَا وَبَیْنَکُم﴾ [الشوریٰ: ۱۵] [ہمارے لیے ہمارے اعمال ہیں اور تمھارے لیے تمھارے اعمال۔ہمارے درمیان اور تمھارے درمیان کوئی جھگڑا نہیں ] یہ آیتِ سیف سے منسوخ ہے اور علی العموم خطاب یہود یا کافروں کو ہے۔ پانچویں آیت: ﴿مَنْ کَانَ یُرِیْدُ حَرْثَ الْاٰخِرَۃِ نَزِدْ لَہٗ فِیْ حَرْثِہ﴾ [الشوریٰ: ۲۰] [جو کوئی آخرت کی کھیتی چاہتا ہے ہم اس کے لیے اس کی کھیتی میں اضافہ کریں گے] کہتے ہیں کہ یہ آیت اﷲ تعالیٰ کے اس ارشاد: ﴿مَنْ کَانَ یُرِیْدُ الْعَاجِلَۃ﴾ [بني إسرائیل: ۱۸] [جو شخص اس جلدی والی (دنیا) کا ارادہ رکھتا ہو] سے منسوخ ہے،مگر از روے تحقیق یہ نسخ نہیں ہے،کیونکہ آیت کا معنی یہ ہے کہ اﷲ آخرت کی نیت پر دنیا میں جو کچھ چاہتا ہے دیتا ہے اور دنیا کی نیت پر دنیا ہی دیتا ہے۔یہ قتادہ رحمہ اللہ نے کہا ہے۔قشیری رحمہ اللہ نے کہا ہے کہ ظاہر یہ ہے کہ یہ آیت کافر کے بارے میں ہے،لیکن یہ تخصیص بغیر مخصص ہوگی۔