مجموعہ علوم القرآن

نافرمان مسلمانوں کے لیے خلودِ نار کا حکم کیا گیا تھا۔اس کے بعد اس سے تائبین کا استثنا کردیا تو حکم اول منسوخ ہوگیا،لیکن درحقیقت یہ مخصوص ہوگیا،منسوخ نہیں۔ سورۃ الشعراء: جمہور کے نزدیک یہ سورت مکی ہے۔سیدنا ابن عباس رضی اللہ عنہما نے فرمایا ہے کہ اس کے آخر کی چار آیتیں مدینے میں اتریں اور وہ ﴿وَالشُّعَرَآئُ یَتَّبِعُھُمُ الْغَاؤن،الخ﴾ [الشعراء: ۲۲۴] [اور شاعر لوگ،ان کے پیچھے گمراہ لوگ لگتے ہیں ] ہیں۔[1] اس سورت میں ناسخ و منسوخ کوئی آیت نہیں ہے،بلکہ پوری سورت محکم ہے۔ہاں بعض کے نزدیک ایک آیت ﴿وَالشُّعَرَآئُ یَتَّبِعُھُمُ الْغَاؤن﴾ [الشعراء: ۲۲۴] [اور شاعر لوگ،ان کے پیچھے گمراہ لوگ لگتے ہیں ] منسوخ ہے۔وہ کہتے ہیں کہ یہ آیت اس ارشاد: ﴿اِِلَّا الَّذِیْنَ اٰمَنُوْا وَعَمِلُوا الصّٰلِحٰتِ﴾ [الشعراء: ۲۲۷] [مگر وہ جو ایمان لائے اور انھوں نے نیک اعمال کیے] سے منسوخ ہے،لیکن حقیقت میں استثنا کی وجہ سے مخصوص ہے،منسوخ نہیں۔ سورۃ النمل: امام قرطبی رحمہ اللہ نے کہا ہے کہ سب کے نزدیک یہ سورت مکی ہے۔[2] یہ ساری سورت محکم ہے۔لیکن بعض کے نزدیک اس میں ایک آیت منسوخ ہے اور وہ اﷲ کا ارشاد: ﴿اِنَّمَآ اَنَا مِنَ الْمُنْذِرِیْن﴾ [النمل: ۹۲] [میں تو بس ڈرانے والوں میں سے ہوں ] ہے،یعنی میرا فرض صرف انذار ہے،جو’’إعلام مع التخویف‘‘ [ڈراتے ہوئے آگاہ کر دینا] ہوتا ہے۔وہ آیتِ سیف سے منسوخ ہے۔اس کے باوجود نظمِ آیت غیر منسوخ ہے،کیونکہ آپ بے شک منذر و مبشر ہیں۔ سورۃ القصص: حسن،عکرمہ اور عطا رحمہ اللہ علیہم کے نزدیک پوری سورت مکی ہے اور سیدنا ابن عباس رضی اللہ عنہما نے فرمایا کہ مکے اور مدینے کے درمیان اتری۔ابن سلام رحمہ اللہ نے کہا ہے کہ ہجرت کے وقت’’جحفہ‘‘ میں اتری۔[3]اس میں ایک حکم منسوخ ہے اور وہ یہ ہے: ﴿لَنَآ اَعْمَالُنَا وَ لَکُمْ اَعْمَالُکُمْ﴾ [القصص: ۵۵]

[1] فتح القدیر (۴/ ۱۲۴) [2] فتح القدیر (۴/ ۱۶۵) [3] فتح القدیر (۴/ ۲۰۸)