مجموعہ علوم القرآن

بیہقی نے فرمایا ہے کہ’’عشر‘‘ یہاں اس میں سے ہے،جس کا حکم اور رسم دونوں منسوخ ہیں اور’’خمس‘‘ کی رسم منسوخ اور حکم برقرار ہے،اس دلیل سے کہ جب صحابہ کرام رضی اللہ عنہم نے قرآن کریم کو یکجا کیا تو اس آیت کو نہیں لکھا،جبکہ اس کا حکم ان کے نزدیک برقرار ہے۔ابن السمعانی رحمہ اللہ نے کہا ہے کہ عائشہ رضی اللہ عنہا کی بات کہ’’ہي مما یتلٰي من القرآن‘‘ کا معنی یہ ہے کہ اس کا حکم متلو ہے نہ کہ لفظ۔بیہقی نے فرمایا ہے کہ اس کا معنی یہ ہے کہ جسے اس کی تلاوت کا نسخ نہیں پہنچا ہے،وہ اس کی تلاوت کرتا ہے۔[1] 5۔رسم منسوخ ہو نہ کہ حکم،اور اس کے ناسخ کا پتا نہ ہو،جیسا کہ صحیح میں آیا ہے: ((لَوْ کَانَ لِابْنِ آدَمَ وَادِیَانِ مِنْ ذَھَبٍ لَتَمَنّٰی لَھُمَا ثَالِثًا،وَلَا یَمْلَأُ جَوْفَ ابْنِ آدَمَ إِلَّا التُّرَابُ،وَیَتُوْبُ اللّٰہُ عَلیٰ مَنْ تَابَ)) [2] [اگر ابن آدم کے پاس دو سونے سے بھری ہوئی وادیاں ہوں تو وہ ان کے ساتھ تیسری کی تمنا کرے گا۔ابن آدم کے پیٹ کو صرف (قبر کی) مٹی ہی بھر سکتی ہے۔اللہ تعالیٰ جو اس کی طرف رجوع کرتا ہے،اس کی توبہ قبول کرتا ہے] کیونکہ یہ قرآن تھا جس کی رسم منسوخ ہے نہ کہ اس کا حکم۔حافظ ابن عبدالبر رحمہ اللہ نے’’تمہید‘‘ میں کہا ہے کہ کہا جاتا ہے کہ یہ سورۂ’’ص‘‘ میں تھی اور جیسے صحیح میں مروی ہے کہ قرآن میں اہلِ بئر معونہ کی حکایت کا نزول ہوا کہ انھوں نے کہا:’’بلغوا قومنا أن قد لقینا ربّنا فرضي عنا وأرضانا‘‘[3] [ہماری قوم کو یہ پیغام پہنچا دو کہ ہماری اپنے رب تعالیٰ کے ساتھ ملاقات ہو گئی ہے،وہ ہم سے راضی ہو گیا ہے اور ہمیں بھی راضی کر دیا ہے] اور جیسا کہ مستدرک میں حاکم رحمہ اللہ زر بن حبیش رحمہ اللہ کی روایت سے ابی بن کعب رضی اللہ عنہ سے لائے ہیں کہ نبی صلی اللہ علیہ وسلم نے ان کے سامنے یہ آیت پڑھی ﴿لَمْ یَکُنِ الَّذِیْنَ کَفَرُوْا﴾اور اس میں پڑھا: ((إِنَّ ذَاتَ الدِّیْنِ عِنْدَ اللّٰہِ الْحَنِیْفِیَّۃُ لَا الْیَھُوْدِیَّۃُ وَلَا النَّصْرَانِیَّۃُ وَمَنْ یَّعْمَلْ خَیْراً فَلَنْ یُّکْفَرَ)) [4]

[1] إرشاد الفحول (۲/ ۶۵) [2] مسند أحمد (۵/ ۱۱۷) سنن الترمذي،رقم الحدیث (۳۸۹۸) [3] صحیح البخاري،رقم الحدیث (۱۰۰۳) صحیح مسلم،رقم الحدیث (۶۷۷) [4] المستدرک للحاکم (۲/ ۵۳۱)