مجموعہ علوم القرآن

رسول اللہ صلی اللہ علیہ وسلم تشریف لے آئے اور ابو ایوب کی یہ بات سنی تو فرمایا: ((صَدَقَ أَبُوْ أَیُّوْبَ))[ابو ایوب نے سچ کہا ہے۔]‘‘[1] (رواہ أحمد) 10۔سیدنا ابوہریرہ رضی اللہ عنہ سے مرفوعًا مروی الفاظ یہ ہیں کہ رسول اللہ صلی اللہ علیہ وسلم نے فرمایا: ’’جمع ہو جاؤ! میں تم پر ثلث قرآن پڑھوں گا۔لوگ جمع ہو گئے تو آپ صلی اللہ علیہ وسلم نے باہر آ کر ﴿قُلْ ھُوَ اللّٰہُ اَحَد﴾ (سورۃالاخلاص) پڑھی اور تشریف لے گئے۔صحابہ کرام رضی اللہ عنہم نے ایک دوسرے سے کہا: رسول اللہ صلی اللہ علیہ وسلم نے تو فرمایا تھا کہ میں تہائی قرآن پڑھوں گا۔ہم سمجھتے تھے کہ کوئی خبر آسمان سے آئی ہو گی۔آپ صلی اللہ علیہ وسلم نے باہر نکل کر فرمایا: میں نے تم سے جو کہا تھا وہ ٹھیک ہے: ((أَلَا! وَ إِنَّھَا تَعْدِلُ ثُلُثَ الْقُرْآنِ))[سن لو! یقینا وہ ثلث قرآن کے برابر ہے۔]‘‘[2] (ھکذا رواہ مسلم،و رواہ الترمذي و قال: حسن صحیح غریب) حافظ ابن کثیر رحمہ اللہ نے اپنی تفسیر میں اس سورت کے ثلث قرآن ہونے کے بارے میں بہت سی احادیث نقل کی ہیں۔[3] 11۔سیدنا ابو درداء رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ’’کیا تم اس بات سے عاجز ہو کہ ہر دن تہائی قرآن مجید پڑھو؟ انھوں نے کہا: ہاں اے اللہ کے رسول صلی اللہ علیہ وسلم ! ہم اس سے اضعف اور اعجز ہیں۔آپ صلی اللہ علیہ وسلم نے فرمایا: اللہ تعالیٰ نے قرآن مجید کے تین ٹکڑے کیے۔﴿قُلْ ھُوَ اللّٰہُ اَحَد﴾ ثلث قرآن ہے۔‘‘[4] (رواہ أحمد و مسلم والنسائي) اس سے یہ بھی ثابت ہوا کہ اس سورت کو ہر شخص ہر شب و روز ضرور پڑھ لیا کرے۔ 12۔ام کلثوم بنت عقبہ بن معیط رضی اللہ عنہا سے مرفوعاً مروی حدیث میں اس سورت کو ثلث قرآن ٹھہرایا گیا ہے۔[5] (رواہ أحمد والنسائي فيالیوم واللیلۃ)

[1] مسندأحمد (۲/۱۷۳) اس کی سند میں بھی ابن لہیعہ راوی ضعیف ہے۔ [2] صحیح مسلم،رقم الحدیث (۸۱۲) سنن الترمذي،رقم الحدیث (۲۹۰۰) [3] تفسیر ابن کثیر (۴/۷۳۳) [4] مسندأحمد (۶/۴۴۷) صحیح مسلم،رقم الحدیث (۸۱۱) سنن النسائي الکبریٰ (۶/۱۷۶) [5] مسندأحمد (۶/۴۰۳) سنن النسائي الکبریٰ (۶/۱۷۵)