مجموعہ علوم القرآن

1۔ابی بن کعب رضی اللہ عنہ سے مرفوعًا مروی ہے کہ جس نے یہ سورت پڑھی،اس نے گویا ایک تہائی قرآن پڑھا۔‘‘[1] (أخرجہ أحمد والنسائي وغیرھما) 2۔انس رضی اللہ عنہ کہتے ہیں کہ ایک آدمی رسول اللہ صلی اللہ علیہ وسلم کی خدمت میں حاضر ہوا اور کہا: ’’إني أحب ھٰذہ السورۃ‘‘ [میں اس سورت (سورۃ الاخلاص) سے محبت کرتا ہوں ] آپ صلی اللہ علیہ وسلم نے فرمایا: ((حُبُّکَ إِیَّاھَا أَدْخَلَکَ الْجَنَّۃَ)) [2] (رواہ أحمد والترمذي والبیہقي) [تیری اس کے ساتھ محبت تجھے جنت میں داخل کر دے گی] جس نے اس سورت کو پڑھا،اس کے اتنے اتنے گناہ بخش دیے گئے،اس بارے میں بہت سی احادیث سنن وغیرہ میں آئی ہیں،لیکن وہ سب ضعیف و غریب اور بعض موضوع ہیں۔ہاں اس کا ثلث قرآن ہونا کئی طرح سے ثابت ہے،اس بارے میں بعض احادیث صحیح اور بعض حسن ہیں۔ 3۔چنانچہ ابو سعید خدری رضی اللہ عنہ سے مروی حدیث میں رسول اللہ صلی اللہ علیہ وسلم نے فرمایا: ’’قسم ہے اس کی جس کے ہاتھ میں میری جان ہے! یہ سورت تہائی قرآن کے برابر ہے۔‘‘[3] (رواہ أحمد والبخاري وغیرھما) سورۃالاخلاص چھوٹی سی سورت ہونے کے باوجود تمام معارفِ الٰہیہ کو شامل ہے اور ملحد پررد کرتی ہے۔حدیث میں جو اسے ایک تہائی قرآن کے برابر قرار دیا گیا ہے تو اس کی وجہ یہ ہے کہ اس سورت کے مقاصد عقائد و احکام اور قصص میں محصور ہیں۔ علامہ زمخشری رحمہ اللہ نے تفسیر کشاف میں جو یہ کہا ہے کہ یہ سارے قرآن کے برابر ہے،[4] سودوانی نے کہا ہے کہ میں نے یہ روایت کتبِ تفسیر و حدیث میں نہیں دیکھی۔انتہیٰ۔ میں کہتا ہوں کہ گو یہ روایت نہ ہو،لیکن اس کے معنی صحیح ہیں۔جب ایک بار کا پڑھنا تہائی قرآن کے برابر ٹھہرا تو تین بار کا پڑھنا یقینا سارے قرآن کے برابر ہو گیا۔

[1] صحیح البخاري،رقم الحدیث (۴۷۲۷) صحیح مسلم،رقم الحدیث (۸۱۱) سنن النسائي الکبریٰ (۶/۳۵) مسندأحمد (۳/۸) صحیح الترغیب والترھیب (۲/۹۳) [2] مسند أحمد (۳/۱۴۱) سنن الترمذي (۵/۱۷۰) شعب الإیمان للبیہقي (۲۳۱۰) [3] مسندأحمد (۳/۳۵) صحیح البخاري،رقم الحدیث (۶۹۳۹) [4] تفسیر الکشاف (۴/۸۲۴)