مجموعہ علوم القرآن

سورت یٰسین کے فضائل و خصائص فضائل: 1۔سیدنا معقل بن یسار رضی اللہ عنہ مرفوعاً کہتے ہیں : ((قَلْبُ الْقُرْآنِ یٰسِیْنُ لَا یَقْرَأُھَا رَجُلٌ یُرِیْدُ اللّٰہَ وَالدَّارَ الآخِرَۃَ إِلاَّ غُفِرَ لَہٗ،إِقْرأُوْھَا عَلٰی مَوْتَاکُمْ)) [1] (رواہ النسائي) [سورت یٰسین قرآن مجید کا دل ہے،جو آدمی بھی اللہ کے لیے اور آخرت کے لیے اس کی تلاوت کرتا ہے اسے بخش دیا جاتا ہے،اسے اپنے مردوں (قریب المرگ لوگوں) پر پڑھو] اس حدیث سے ظاہر تو یہ ہے کہ موت کے حاضر ہونے کے وقت پڑھے،لیکن لفظ کا عموم موت کے بعد پڑھنے کو بھی شامل ہے۔ 2۔سیدنا انس رضی اللہ عنہ سے مرفوعاً مروی حدیث کے الفاظ یہ ہیں : ((إِنَّ لِکُلِّ شَیْیٍٔ قَلْباً،وَقَلْبُ الْقُرْآنِ یٰسِیْنُ،مَنْ قَرَأَ یٰسِیْن کَتَبَ اللّٰہُ لَہٗ بِقِرَائَ تِھَا قِرَائَ ۃَ الْقُرْآنِ عَشْرَ مَرَّاتٍ)) [2] (رواہ الترمذي والدارمي،وقال الترمذي: ھٰذا حدیث غریب) [یقینا ہر چیز کا دل ہوتا ہے اور قرآن کا دل سورت یٰسین ہے،جو شخص ایک مرتبہ سورت یٰسین پڑھتا ہے تو اس کی قراء ت کی وجہ سے اللہ تعالیٰ اس کے لیے دس مرتبہ قرآن پڑھنے کا ثواب لکھ دیتا ہے] 3۔سیدنا جندب رضی اللہ عنہ سے مروی حدیث کے الفاظ یہ ہیں کہ رسول اللہ صلی اللہ علیہ وسلم نے فرمایا: ((مَنْ قَرَأَ یٰسِیْن فِيْ لَیْلَۃٍ ابْتِغَائَ وَجْہِ اللّٰہِ غُفِرَ لَہٗ)) [3] (رواہ مالک)

[1] مسند أحمد (۵/ ۲۶) سنن النسائي الکبریٰ (۶/۲۶۵) اس کی سند میں بعض روات مجہول ہیں۔ [2] سنن الترمذي،رقم الحدیث (۲۸۸۷) سنن الدارمي (۲/۵۴۸) اس کی سند میں’’ہارون ابو محمد‘‘ مجہول ہے۔ [3] نیز دیکھو: تحفۃ الذاکرین (ص: ۳۱۳) [مولانا عطاء اﷲ حنیف بھوجیانی رحمہ اللہ ] سنن الدارمي (۲/ ۵۴۹) صحیح ابن حبان (۶/ ۳۱۲) اس کی سند میں حسن بصری مدلس ہیں۔