مجموعہ علوم القرآن

قرآن مجید کی تلاوت کرنے والے اورحافظ وغیرہ کے فضائل کا بیان 1۔اللہ تعالیٰ نے فرمایا ہے: ﴿اِنَّ الَّذِیْنَ یَتْلُوْنَ کِتٰبَ اللّٰہِ ﴾ [الفاطر: ۲۹] [بے شک وہ لوگ جو اللہ کی کتاب کی تلاوت کرتے ہیں ] اہلِ علم نے کہا ہے کہ اس سے مراد تلاوت پر مداومت اور اس کی آیات پر عمل کرنا ہے،کیوں کہ عمل کے بغیر خالی تلاوت کا کچھ نفع نہیں ہے۔[1] 2۔سیدنا ابو موسیٰ اشعری رضی اللہ عنہ سے مروی حدیث میں رسول اللہ صلی اللہ علیہ وسلم نے فرمایا ہے کہ اس مومن کی مثال جو قرآن پڑھتا ہے،جیسے اترجہ (نارنگی) ہے کہ اس کی بُو بھی اچھی اور مزہ بھی اچھا اور منافق کی مثال جو قرآن پڑھتا ہے،جیسے ریحانہ (نازبو) کہ اس کی بو تو اچھی ہے مگر مزہ تلخ ہے اور جو منافق قرآن نہیں پڑھتا،وہ حنظل (تمّے) کی طرح ہے کہ بُو بھی نہیں اور مزہ بھی کڑوا۔[2] (رواہ أحمد والشیخان وأہل السنن الأربعۃ) 3۔سیدنا عبداللہ بن عمر رضی اللہ عنہما مرفوعاً مروی روایت میں کہتے ہیں : ((حَمَلَۃُ الْقُرْآنِ أَوْلِیَائُ اللّٰہِ تَعَالیٰ،فَمَنْ عَادَاھُمْ فَقَدْ عَادَی اللّٰہَ،وَمَنْ وَالَاھُمْ فَقَدْ وَالَی اللّٰہَ)) [3]

[1] تفسیر روح البیان (۷/ ۲۶۹) [2] صحیح البخاري،رقم الحدیث (۷۱۲۱) صحیح مسلم،رقم الحدیث (۷۹۷) مسند أحمد (۴/۳۹۷) سنن أبي داؤد،رقم الحدیث (۴۸۲۹) سنن الترمذي،رقم الحدیث (۲۷۶۵) سنن النسائي،رقم الحدیث (۵۰۳۸) سنن ابن ماجہ،رقم الحدیث (۲۱۴) [3] مسند الفردوس بمأثور الخطاب للدیلمي (۳/۱۳۵) اس کی سند میں’’داود بن المحبر‘‘ راوی وضاع ہے،لہٰذا یہ روایت موضوع ہے۔تفصیل کے لیے دیکھیں : سلسلۃ الأحادیث الضعیفۃ،رقم الحدیث (۲۲۴)