خلفائے رسول ص شخصیت،حالات زندگی،عہد خلافت

کچھ کہا: اس پر انس رضی اللہ عنہ نے کہا کہ حسین رسول اللہ صلی اللہ علیہ وسلم کے سب سے زیادہ مشابہ تھے، انھوں نے وسمہ[1] کا خضاب استعمال کر رکھا تھا۔[2] سیّدنا علی رضی اللہ عنہ غزوۂ احد میں : اس غزوہ میں علی رضی اللہ عنہ نے اپنے بے باک شجاعت کا مظاہرہ کیا، جب آپ صلی اللہ علیہ وسلم کے بارے میں یہ خبر پھیل گئی کہ آپ شہید کردیے گئے اور علی رضی اللہ عنہ کو آپ نظر نہ آئے تو آپؓ نے سوچا کہ رسول اللہ صلی اللہ علیہ وسلم کے بغیر زندگی میں لطف ہی کیا ہے۔ پھر آپ اٹھے اور تلوار کی میان توڑ دیا اور دشمن پر پل پڑے، مسلمانوں نے آپ کے لیے راستہ خالی کردیا، اچانک آپ کی نگاہ رسول اللہ صلی اللہ علیہ وسلم پر پڑی۔[3] آپ رسول اللہ صلی اللہ علیہ وسلم کے ساتھ ہوگئے اور جانباز بہادروں کی طرح آپ کی طرف سے دفاع کیا، اس جنگ میں آپ کو سولہ (۱۶) ضربیں آئیں ۔ سیّدنا علی رضی اللہ عنہ (غزوۂ بنونضیر) میں : محقق مؤرخین کا خیال ہے کہ غزوۂ بنونضیر، غزوۂ احد کے بعد ربیع الاول ۴ھ میں ہوا، او رامام ابن القیم رحمہ اللہ نے محمد بن شہاب زہری وغیرہ مورخین کے اس قول کی تردید کی ہے کہ غزوۂ بنونضیر غزوۂ بدر کے چھ مہینے بعد ہوا، آپ فرماتے ہیں : یہ ان کا وہم ہے، یا ان کی طرف غلط نسبت کر دی گئی ہے، صحیح بات یہ ہے کہ غزوۂ بنونضیر، غزوۂ احد ہی کے بعد ہے۔ غزوۂ بدر کے بعد جوغزوہ ہے وہ غزوۂ بنوقینقاع ہے، اور پھر غزوۂ بنوقریظہ غزوۂ خندق کے بعد اور غزوۂ خیبر غزوۂ حدیبیہ کے بعد ہے۔[4] ابن العربی او رابن کثیر کی بھی یہی رائے ہے۔[5] سیّدنا علی رضی اللہ عنہ (غزوہ حمراء الاسد): دراصل یہ غزوہ، غزوۂ احد کی تکمیل اور اس کی آخری کڑی ہے، پندرہ شوال ۳ھ کی شنبہ کی شام کو مسلمان غزوۂ احد سے لوٹ کر گھروں کو واپس آئے تھے اور ابھی رات گزار کر فجر کی نماز کے لیے باہر نکلے ہی تھے کہ موذن رسول نے جلد سے جلد دشمنوں کو دور بھگانے کی فورًا تیار کا اعلان کیا، او رکہا کہ اس مہم میں صرف وہی لوگ شریک ہوں ، جنھوں نے غزوۂ احد میں شرکت کی ہو، چنانچہ شرکائے اُحد اگرچہ زخم خوردہ اور تھکن سے چور تھے تاہم اعلان نبوی پر لبیک کہا، اس مہم میں آپ صلی اللہ علیہ وسلم پیش پیش تھے۔ آپ نے عبداللہ بن ابی کو اپنے ساتھ چلنے کی اجازت نہ دی اور نہ جابر بن عبداللہ بن عمرو بن حزام رضی اللہ عنہما کے علاوہ کسی دوسرے غیر شرکاء کو شرکت کی اجازت دی، انھیں اجازت اس وجہ سے دی تھی کہ ان کے باپ غزوۂ احد میں شہید ہوگئے تھے اور بدر و اُحد میں خوداس لیے شرکت نہ کرسکے تھے کہ گھر پر اپنی جواں سال بہنوں کی دیکھ بھال کر رہے تھے، بہرحال آپ صلی اللہ علیہ وسلم نے مہم کو آگے بڑھایا، اور مسلمانوں کا لشکر

[1] وسمہ ایک پودا ہے جو یمن میں پایا جاتا ہے اس کے پتوں سے بالوں کو خضاب کیا جاتا ہے۔ [2] صحیح البخاری ، حدیث نمبر (۳۷۴۸)۔ [3] شرح النووی، صحیح مسلم (۱۲؍۱۴۸)۔ [4] زاد المعاد (۳؍۲۴۹)۔ [5] أحکام القرآن؍ ابن العربی (۴؍۱۷۶۵) حدیث القرآن عن الغزوات (۱؍۲۴۵)۔